കുട്ടി​കളേ ഇത് ചെറിയ കളിയല്ല...

ട്രാക്കിൽ ഇരുമ്പുപാളികൾ കൊണ്ടിടുന്നതും ട്രെയിനുകൾക്ക് കല്ലെറിയുന്നതും കൂടിയ സാഹചര്യത്തിൽ കുട്ടികളെ കാണാൻ പൊലീസ് സ്കൂളിലെത്തി ഉദുമ: റെയിൽവേ ട്രാക്കിൽ അട്ടിമറി സാധ്യതകളോടെ കല്ലുവെക്കുന്നതും ട്രെയിനുകൾക്ക് കല്ലെറിയുന്നതും പതിവാകുന്നതിന്റെ ഭവിഷ്യത്തുകളെക്കുറിച്ച് ബോധവത്കരണം നടത്താൻ റെയിൽവേ പൊലീസിന്റെ നേതൃത്വത്തിൽ ബേക്കൽ ഗവ. ഫിഷറീസ് ഹയർ സെക്കൻഡറി സ്കൂളിൽ വിദ്യാർഥികൾക്ക് ക്ലാസ് സംഘടിപ്പിച്ചു. ജില്ലയിൽ വിവിധ ഇടങ്ങളിൽ ഇരുമ്പു പാളികളും കല്ലുകളും പാളത്തിൽ നിരത്തി അട്ടിമറി ശ്രമം നടന്നതിന്റെയും ഓടുന്ന വണ്ടികൾക്ക് കല്ലെറിയുന്നതും വർധിക്കുന്ന പശ്ചാത്തലത്തിലാണ് ക്ലാസ് നടത്തിയത്. പി.ടി.എ പ്രസിഡന്റ് കെ.വി. ശ്രീധരൻ അധ്യക്ഷത വഹിച്ചു. കാസർകോട് റെയിൽവേ പൊലീസ് ജി.ആർ.പി. സബ് ഇൻസ്‌പെക്ടർ മോഹനൻ, അസി. സബ് ഇൻസ്പെക്ടർ ബിനോയ് കുര്യൻ, സ്കൂൾ പ്രിൻസിപ്പൽ എം.കെ. മുരളി, കാസർകോട് ജി.ആർ.പി. സ്റ്റേഷൻ ഓഫിസർ സനിൽകുമാർ, സീനിയർ സിവിൽ പൊലീസ് ഓഫിസർ പി.പി. അജയൻ എന്നിവർ ക്ലാസിന് നേതൃത്വം നൽകി.