പ്രതിഷേധപ്പെരുമഴ; തെരുവ് അശാന്തം (ലീഡ്​)

-പ്രതിപക്ഷ സംഘടനകൾക്കുപിന്നാലെ ഭരണപക്ഷവും പ്രതിഷേധവുമായി തെരുവിൽ, നീലേശ്വരത്ത് കോൺഗ്രസ് ഓഫിസ് തകർത്തു കാസർകോട്: സ്വർണക്കടത്ത് കേസിൽ മുഖ്യമന്ത്രി​ രാജിവെക്കണമെന്നാവശ്യപ്പെട്ട് പ്രതിപക്ഷ സംഘടനകൾ ജില്ലയിലെങ്ങും നടത്തിയ പ്രതിഷേധങ്ങൾക്കുപിന്നാലെ ഭരണപക്ഷ സംഘടനകളും തെരുവിലിറങ്ങി. മുഖ്യമന്ത്രി പിണറായി വിജയനെ വിമാനത്തിൽ അപായപ്പെടുത്താൻ ശ്രമിച്ചു​വെന്നാരോപിച്ച് ഭരണപക്ഷ സംഘടനകളായ സി.പി.എമ്മും ഡി.വൈ.എഫ്.ഐയുമാണ് പ്രതിഷേധവുമായെത്തിയത്. ഇതോടെ, ജില്ലയിലെ വിവിധയിടങ്ങളിൽ സംഘർഷഭീതി ഉടലെടുത്തു. പ്രതിപക്ഷ സംഘടനകൾക്കെതിരെ രൂക്ഷമായ മുദ്രാവാക്യമുയർത്തി തിങ്കളാഴ്ച വൈകീട്ടാണ് സി.പി.എം- ഡി.വൈ.എഫ്.ഐ പ്രവർത്തകർ പ്രതിഷേധവുമായെത്തിയത്. നീലേശ്വരം കോൺഗ്രസ്‌ മണ്ഡലം കമ്മിറ്റി ഓഫിസ് അടിച്ചുതകർത്തു. മുഖ്യമന്ത്രിയെ വിമാനത്താവളത്തിൽ ആക്രമിക്കാൻ ശ്രമിച്ചുവെന്നാരോപിച്ച് ഡി.വൈ.എഫ്.ഐ നീലേശ്വരത്ത് നടത്തിയ പ്രതിഷേധങ്ങൾക്കു പിന്നാലെയാണ് ആക്രമണം. ജില്ലയിലെ മിക്കയിടത്തും ഭരണപക്ഷ സംഘടനകൾ വൈകീട്ട് പ്രകടനം നടത്തി.