കെ.എസ്​.ആർ.ടി.സി ആസ്​ഥാന മാറ്റം: എൻ.എ. നെല്ലിക്കുന്ന്​ മന്ത്രിയെ കണ്ടു

കാസർകോട്​: കെ.എസ്​.ആർ.ടി.സി ജില്ല ആസ്​ഥാനം കാഞ്ഞങ്ങാ​ട്ടേക്ക്​ മാറ്റാൻ തീരുമാനിച്ച സംഭവത്തിൽ എൻ.എ. നെല്ലിക്കുന്ന്​ എം.എൽ.എ ഗതാഗതമന്ത്രി ആൻറണി രാജുവുമായി സംസാരിച്ചു. ഇതുസംബന്ധിച്ച്​ മുഖ്യമന്ത്രിക്കും മന്ത്രിക്കും നിവേദനം കൈമാറിയതായി എം.എൽ.എ അറിയിച്ചു. അന്തർ സംസ്​ഥാന സർവിസുകൾ ഏറ്റവും കൂടുതൽ ഓപറേറ്റ്​ ചെയ്യുന്ന കാസർകോട്ടുനിന്നും ആസ്​ഥാനം മാറ്റുന്നത്​ ശരിയായ നടപടിയല്ലെന്ന്​ അദ്ദേഹം മന്ത്രിയെ ധരിപ്പിച്ചു. പുതിയ തീരുമാനത്തോടെ കാഷ്​ കൗണ്ടറും സർവിസ്​ ഓപറേഷനും മാത്രം ഉള്ള ഡിപ്പോയായി മാറും. വിദ്യാർഥികളുടെ യാത്രാപാസ്​ നൽകുന്നതുൾപ്പെടെയുള്ള പ്രശ്​നങ്ങൾ ഉടലെടുക്കുമെന്നും എം.എൽ.എ അറിയിച്ചു. പ്രശ്​നം ശ്രദ്ധയിൽപെടുത്തിയിട്ടുണ്ടെന്നും പരിശോധിച്ച്​ പരിഗണിക്കാമെന്നും മന്ത്രി അറിയിച്ചതായി എൻ.എ.നെല്ലിക്കുന്ന്​ എം.എൽ.എ അറിയിച്ചു.