വിമാനത്താവളത്തിലും ആശുപത്രികളിലും ആശങ്കയുടെ നിമിഷങ്ങൾ

കൊണ്ടോട്ടി: അപകടമുണ്ടായ കരിപ്പൂർ വിമാനത്താവളത്തിലും പരിക്കേറ്റവരെ എത്തിച്ച ആശുപത്രികളിലും യുദ്ധസമാന രംഗങ്ങളാണ്​ അരങ്ങേറിയത്​. രക്ഷാപ്രവർത്തകരുടെയും ഉറ്റവർ അപകടത്തിൽപ്പെ​ട്ടോയെന്ന്​ അന്വേഷിക്കാനെത്തിയവരുടെയും തിരക്കായിരുന്നു രണ്ടിടത്തും. നല്ല മഴ പെയ്യുന്നതിനിടെയാണ്​ വിമാനം അപകടത്തിൽപ്പെടുന്നത്​. വലിയ ശബ്​ദം കേട്ട്​ പ്രദേശവാസികളാണ്​ ആദ്യമെത്തിയത്​. ആദ്യം വാർത്ത പരന്നത്​ കാർഗോ വിമാനം അപകടത്തിൽപ്പെട്ടു എന്നാണ്​. പിന്നീടാണ്​ യാത്രാവിമാനമാണെന്ന്​ അറിഞ്ഞതും കൂടുതൽ ​േപർ രക്ഷാപ്രവർത്തനത്തിന്​ എത്തിയതും.

പരിക്കേറ്റവരെ കൊ​ണ്ടോട്ടിയിലെ സ്വകാര്യ ആ​ശുപത്രികളായ മേഴ്​സി ഹോസ്​പിറ്റൽ, റിലീഫ് ഹോസ്​പിറ്റൽ എന്നിവിടങ്ങളിലാണ്​ ആദ്യമെത്തിച്ചത്​. ഇരു ആശുപത്രികളും പരിക്കേറ്റവരെ കൊണ്ട്​ നിറഞ്ഞു. കാഷ്വാലിറ്റിയും സമീപ വാർഡുകളും നിറഞ്ഞതിനെ തുടർന്ന്​ പരിക്കേറ്റവരെ തറയിൽ വരെ കിടത്തേണ്ടി വന്നു. ഇതോടെ സമീപത്തെ മറ്റു ആശുപത്രികളിലേക്കും പരിക്കേറ്റവരെ എത്തിച്ചു.

ഇവിടങ്ങളില്‍ പ്രാഥമിക ശുശ്രൂഷ നൽകി ഗുരുതര പരിക്കേറ്റവരെ മഞ്ചേരി മെഡിക്കൽ കോളജ്​, കോഴിക്കോട്​ മെഡിക്കൽ കോളജ്​, കോഴിക്കോട്​ മിംസ്​, കോഴിക്കോട്​ ബേബി തുടങ്ങിയ ആശുപത്രികളിലേക്ക്​ കൊണ്ടുപോകുകയായിരുന്നു. ഇതിനായി ആംബുലൻസുകൾ എത്തിക്കുകയായിരുന്നു പ്രധാന വെല്ലുവിളി. കൊണ്ടേ​ാട്ടി മുനിസിപ്പാലിറ്റിയിലെയും സമീപ പഞ്ചായത്തുകളിലെയും സ്വകാര്യ ആശുപത്രികളിലേയും വിവിധ സന്നദ്ധ സംഘടനകളുടെയും ആംബുലൻസുകൾ ഇതിനായി എത്തിച്ചു. ഇവയിൽ പരിക്കേറ്റവരെ ഘട്ടംഘട്ടമായി കൊണ്ടുപോകുകയായിരുന്നു. ​

കനത്ത മഴക്കിടയിലും നൂറുകണക്കിനുപേർ ആണ്​ അപകടസ്​ഥലത്തും ആശുപത്രികളിലും രക്ഷാപ്രവർത്തനത്തിനെത്തിയത്​. അപകടത്തി​െൻറ വ്യാപ്​തിയെ കുറിച്ച്​ അറിഞ്ഞതോടെ കൂടുതൽ സന്നദ്ധ-രാഷ്​ട്രീയ സംഘടന പ്രവർത്തകർ കുതിച്ചെത്തി.