കരിപ്പൂർ റൺവേ വികസനം: മാസ്​റ്റർ പ്ലാൻ നിർദേശവുമായി എം.ഡി.എഫ്

കോഴിക്കോട്​: കരിപ്പൂർ വിമാനത്താവള റൺവേയുടെ നീളം 2700 ൽനിന്ന്​ 3200 മീറ്ററായി വർധിപ്പിക്കാൻ പുതിയ മാസ്​റ്റർ പ്ലാൻ നിർദേശം മലബാർ ഡെവലപ്​മെൻറ്​ ​േഫാറം (എം.ഡി.എഫ്​) കേന്ദ്ര സർക്കാറിനും പാർലമെൻറി​െൻറ സ്​റ്റാൻഡിങ്​ കമ്മിറ്റി ചെയർമാൻ ജി. വെങ്കിടേഷ്​ എം.പിക്കും കൈമാറി.

കിഴക്കുഭാഗത്ത്​ റൺവേ 28ൽനിന്ന്​ 500 മീറ്റർ നീളംകൂട്ടാൻ 22 ഏക്കർ ഭൂമി മാത്രമേ ഏറ്റെടുക്കേണ്ടതുള്ളൂ. 780 മീറ്റർ നീളത്തിലും 108 മീറ്റർ വീതിയിലുമുള്ള 68 ഏക്കർ ഭൂമി വിമാനത്താവള അതോറിറ്റിയുടേതായി ഇവിടെയുണ്ട്​. ഇൗ ഭൂമിയുടെ ഇരുവശത്ത്​ താമസിക്കുന്ന ഏതാനും കുടുംബങ്ങളെ നഷ്​ടപരിഹാരം നൽകി 22 ഏക്കർ ഭൂമി ഏറ്റെടുത്താൽ ഇന്ത്യയിലെതന്നെ മികച്ച റൺവേയായി കരിപ്പൂരിനെ മാറ്റാനാവും. മാത്രമല്ല അമേരിക്കൻ സ്​റ്റാൻഡേഡ്​ അനുസരിച്ചുള്ള റൺവേയുടെ ഇരുവശങ്ങളിലായി 75 മീറ്റർ വീതം റൺവേ സ്​ട്രിപ്പുകളും 240 മീറ്റർ റൺവേ എൻറ്​ സേഫ്​റ്റി ഏരിയയും സ്​ഥാപിക്കാം.

കണ്ണൂർ മാതൃകയിൽ ഭൂമി ഏറ്റെടുക്കാനും മണ്ണും കല്ലും കരിപ്പൂരിന്​ നൽകാനും സർക്കാർ തയാറാവണമെന്നും നിവേദനത്തിൽ ചൂണ്ടിക്കാട്ടി. കരിപ്പൂർ വിമാനത്താവളം അടച്ചുപൂട്ടണമെന്ന്​ ആവശ്യപ്പെട്ട്​ അഡ്വ. ഷേണായ്​ ഹൈകോടതിയിൽ നൽകിയ കേസിൽ എതിർ കക്ഷിയായി എം.ഡി.എഫ്​ ഹർജി സമർപ്പിച്ചതായും പ്രസിഡൻറ്​ കെ.എം. ബഷീർ അറിയിച്ചു.