കണ്ണൂര്‍- ആലപ്പുഴ എക്‌സിക്യുട്ടീവ് എക്സ്പ്രസിന്‍റെ കോച്ചുകള്‍ ഷണ്ടിങ്ങിനിടെ പാളംതെറ്റി

കണ്ണൂർ: കണ്ണൂരിൽ നിന്ന് പുറപ്പെടുന്ന കണ്ണൂർ-ആലപ്പുഴ എക്സിക്യുട്ടീവ് എക്സ്പ്രസിന്‍റെ (16308) കോച്ചുകൾ ഷണ്ടിങ്ങിനിടെ പാളംതെറ്റി. രാവിലെയുള്ള സർവിസിന് മുന്നോടിയായി കണ്ണൂർ യാഡിൽ വെച്ചാണ് രണ്ട് കോച്ചുകൾ പാളംതെറ്റിയത്. പുലർച്ചെ 4.40ഓടെയാണ് സംഭവം. ട്രെയിനിൽ യാത്രക്കാർ ഇല്ലാതിരുന്നതിനാൽ ആർക്കും പരിക്കില്ല.

രാവിലെ 5.10ന് കണ്ണൂർ സ്റ്റേഷനിൽ നിന്ന് പുറപ്പെടേണ്ടതായിരുന്നു ട്രെയിൻ. യാഡിൽ നിന്ന് സ്റ്റേഷനിലേക്ക് കൊണ്ടുവരുന്നതിനിടെ പാളംതെറ്റുകയായിരുന്നു. പിന്നീട്, പാളംതെറ്റിയ കോച്ചുകൾ ഒഴിവാക്കി രാവിലെ 6.43നാണ് ട്രെയിൻ പുറപ്പെട്ടത്. പാളംതെറ്റിയ കോച്ചുകൾ ഇടിച്ച് സിഗ്നൽ ബോക്സ് തകർന്നു.