ചെങ്കോട്ട സ്വകാര്യ ഗ്രൂപ്പിന് കൈമാറിയതിനെ ന്യായീകരിച്ച്​ അല്‍ഫോൻസ്​ കണ്ണന്താനം

കൊച്ചി:  ഡല്‍ഹിയിലെ ചെങ്കോട്ടയുടെ പരിപാലനം ഡാല്‍മിയ ഗ്രൂപ്പിന് കൈമാറിയതിനെ ന്യായീകരിച്ച്​ കേന്ദ്രമന്ത്രി അല്‍ഫോൻസ്​ കണ്ണന്താനം. കെട്ടിടം തീറെഴുതി നല്‍കിയെന്ന തരത്തിലുള്ള വാര്‍ത്തകള്‍ വസ്തുതാ വിരുദ്ധമാ​െണന്ന്​ അദ്ദേഹം പറഞ്ഞു. പരിപാലന ചുമതല മാത്രമാണ് ഡാല്‍മിയ കമ്പനിക്ക് നല്‍കിയത്. ഇത് സംബന്ധിച്ച് കോണ്‍ഗ്രസ് ആരോപണങ്ങള്‍ ഉന്നയിക്കുന്നത് ചരിത്രം വിസ്മരിച്ചാണ്.  

പൈതൃക സ്മാരകങ്ങളുടെ നടത്തിപ്പിന് സ്വകാര്യ കമ്പനികളെ പങ്കാളികളാക്കുന്നതില്‍ തെറ്റില്ലെന്ന് മുന്‍പ്രധാനമന്ത്രി ഡോ. മന്‍മോഹന്‍സിങ്​ നിലപാട് വ്യക്​തമാക്കിയത് കോണ്‍ഗ്രസുകാര്‍  മറക്കുന്നു. ചരിത്ര സ്മാരകങ്ങള്‍ കാത്ത് സംരക്ഷിക്കുന്നതില്‍ സര്‍ക്കാറുകള്‍ പരാജയമാണെന്ന് തെളിഞ്ഞ സാഹചര്യത്തില്‍ ഇത്തരമൊരു നടപടിയില്‍ തെറ്റില്ലെന്നും അല്‍ഫോൻസ്​ കണ്ണന്താനം പറഞ്ഞു.

ചെങ്കോട്ട പോലുള്ള സ്മാരകങ്ങള്‍ കാണാന്‍ വര്‍ഷന്തോറും ലക്ഷക്കണക്കിന് വിദേശികളാണ് എത്തുന്നത്. അവര്‍ക്ക്​ ആഗോള നിലവാരത്തിലുള്ള സൗകര്യങ്ങള്‍ ഒരുക്കാൻ കേന്ദ്രസര്‍ക്കാറിന് സാധിക്കുകയില്ല. അതുകൊണ്ടാണ് പരിപാലന ചുമതല സ്വകാര്യ കമ്പനിക്ക് നല്‍കിയത്. ആധുനിക നിലവാരത്തിലുള്ള ടോയ്‌ലറ്റുകളും മറ്റ് സൗകര്യങ്ങളും ഏര്‍പ്പെടുത്തിയാല്‍ മാത്രമേ വിദേശ സഞ്ചാരികളെ ആകര്‍ഷിക്കാന്‍ സാധിക്കൂവെന്ന് വിമര്‍ശിക്കുന്നവര്‍ ഓര്‍ക്കണമെന്നും അദ്ദേഹം മാധ്യമപ്രവർത്തകരോട്​ പറഞ്ഞു.