ബാലഭാസ്കറിൻെറ മരണം: തനിക്ക് ഭീഷണിയുണ്ടെന്ന് കലാഭവൻ സോബി

കൊച്ചി: വയലിനിസ്​റ്റ്​ ബാലഭാസ്കറി​െൻറ അപകടമരണവുമായി ബന്ധപ്പെട്ട് നടത്തിയ വെളിപ്പെടുത്തലിനെത്തുടർന്ന്​ മിമിക്രി താരം കലാഭവൻ സോബി ജോർജിനെതിരെ ഭീഷണി. അദ്ദേഹംതന്നെയാണ് ഇക്കാര്യം വ്യക്തമാക്കിയത്. ‍എന്നാൽ, പറഞ്ഞ വാക്കുകളിൽ ഉറച്ചുനിൽക്കുന്നതായും മൊഴി കൊടുക്കാൻ തയാറാണെന്നും സോബി പറഞ്ഞു.

‘‘സംഭവം നടന്ന സമയം അതുവഴി പോയപ്പോൾതന്നെ ദുരൂഹമായ പലകാര്യങ്ങളും ശ്രദ്ധയിൽപെട്ടിരുന്നു. ബാലുവി​െൻറ സംസ്കാരവും മറ്റും ക‍ഴിഞ്ഞ് വിവാദം ഉയർന്നപ്പോൾ, നിലവിൽ സ്വർണക്കടത്ത്​ കേസിൽ ജയിലിൽ കഴിയുന്ന പ്രകാശ് തമ്പിയെ വിളിച്ച് കാര്യങ്ങളെല്ലാം പറഞ്ഞു. എന്നാൽ, ആദ്യം അനുകൂലമായല്ല പ്രതികരിച്ചത്. കഴിഞ്ഞ കുറെ ദിവസങ്ങളായി പഞ്ചാബിലായിരുന്നു. നാട്ടിലെത്തിയപ്പോഴാണ് അയാൾ അറസ്​റ്റിലായത്​ അറിഞ്ഞത്.

ശനിയാഴ്ച ബാലഭാസ്കറി​െൻറ പിതാവ്​ കെ.സി. ഉണ്ണിയെ വിളിച്ച് കാര്യങ്ങളെല്ലാം പറഞ്ഞു. വെളിപ്പെടുത്തൽ വാർത്തയായതോടെയാണ് ഫോണിലൂടെയും മറ്റും നിരവധി ഭീഷണികൾ വന്നത്. എന്നാൽ, ഇതിൽ ഉറച്ചുനിൽക്കാൻതന്നെയാണ് തീരുമാനം. ഭീഷണിയെ പേടിക്കുന്നില്ല. അന്വേഷണ ഉദ്യോഗസ്ഥർ മൊഴിയെടുക്കാൻ വിളിപ്പിച്ചാൽ പോവും. എറണാകുളം ജില്ലക്കുപുറത്താണെങ്കിൽ സുരക്ഷ ഏർപ്പെടുത്തണം. ജില്ലയിൽ എവിടെയാണെങ്കിലും സുരക്ഷയില്ലാതെ ചെല്ലും’’- സോബി ജോർജ് ‘മാധ്യമ’ത്തോട് പറഞ്ഞു.

2018 സെപ്​റ്റംബർ 25ന് തിരുവനന്തപുരം പള്ളിപ്പുറത്താണ് ബാലഭാസ്കറും കുടുംബവും സഞ്ചരിച്ച വാഹനം അപകടത്തിൽപെട്ടത്. അപകടം നടന്നതിനുപിന്നാലെ ഇതുവഴി വണ്ടി ഓടിച്ചുപോയപ്പോൾ കണ്ട കാര്യങ്ങളാണ് സോബി ജോർജ് വെളിപ്പെടുത്തിയത്.

‘‘അപകടസ്ഥലത്ത് നല്ല ഇരുട്ടായിരുന്നു. റോഡി​​െൻറ ഇടതുവശം ചേർന്ന് 20-25 വയസ്സുള്ള ഒരാൾ ഓടിപ്പോകുന്നതും വലതുഭാഗത്ത് തടിച്ച ഒരാൾ ബൈക്ക് തള്ളിക്കൊണ്ടുപോകുന്നതും ശ്രദ്ധയിൽപെട്ടു. തടിച്ചയാൾക്ക് കാലിനെന്തോ പറ്റിയതുകൊണ്ടാണ്​ വണ്ടി തള്ളിനീക്കിയതെന്ന് ഞാൻ ഊഹിച്ചു. ബാലുവി​െൻറ കാർ മറിഞ്ഞുകിടക്കുന്നതും കണ്ടു. എന്നാൽ, ഇവർ ഒരുവണ്ടിക്കും കൈ കാണിക്കുന്നില്ല. സഹായിക്കാമെന്നുകരുതി ഹോണടിച്ചെങ്കിലും ശ്രദ്ധിച്ചില്ല. പിറകിൽനിന്ന് വാഹനങ്ങൾ നിർത്താതെ ഹോണടിച്ചപ്പോൾ വണ്ടിയോടിച്ച് നീങ്ങുകയും ചെയ്തു’’-അന്നത്തെ സംഭവം സോബി ഓർക്കുന്നു.

പിന്നീടാണ് അപകടത്തിൽപെട്ടത് ബാലഭാസ്കറാണെന്ന്​ അറിഞ്ഞത്. തുടർന്ന് അദ്ദേഹത്തി​െൻറ ബന്ധു മധു ബാലകൃഷ്ണൻ മുഖേന പ്രകാശ് തമ്പിയെ ഫോണിൽ അറിയിച്ചു. അന്വേഷണ ഉദ്യോഗസ്ഥൻ വിളിച്ചാൽ മൊ‍ഴി നൽകണമെന്നാണ് ആവശ്യപ്പെട്ടത്. എന്നാൽ, ആരും ഇതുവരെ ബന്ധപ്പെട്ടില്ല. അന്വേഷണ ഉദ്യോഗസ്ഥ​േൻറതെന്നുപറഞ്ഞ് കിട്ടിയ രണ്ടുനമ്പറിലും ഇതുവരെ ബന്ധപ്പെടാനായില്ലെന്നും സോബി കൂട്ടിച്ചേർത്തു.