നെല്ലുവില: കേ​ന്ദ്രത്തെ കുറ്റപ്പെടുത്താനാവില്ല; ജയസൂര്യ പറഞ്ഞത്​ വസ്തുനിഷ്ഠമായ കാര്യം -കെ. സുധാകരൻ

ആലപ്പുഴ: നെല്ലുവില വിഷയത്തിൽ കേന്ദ്രസർക്കാറിനെ കുറ്റം പറയാനാവി​ല്ലെന്ന്​ കെ.പി.സി.സി പ്രസിഡന്‍റ്​ കെ. സുധാകരൻ. കുട്ടനാട്ടിലെ നെൽകർഷകരുമായി നടത്തിയ കൂടിക്കാഴ്ചക്കുശേഷം മാധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം.

നെല്ല് സംഭരണത്തിന്‍റെ എല്ലാ നടപടിയും പൂർത്തിയാക്കിയശേഷമാണ് കേന്ദ്രസർക്കാർ പണം നൽകുന്നത്. കണക്ക്​ കൊടുത്തതിന്‍റെ പണം കേന്ദ്രം നൽകിയിട്ടുണ്ട്. ഇനിയുള്ള കണക്ക് കൊടുത്താൽ അടുത്ത ഫണ്ട് കേന്ദ്രം അനുവദിക്കും.

നടൻ ജയസൂര്യ പറഞ്ഞത്​ വസ്തുനിഷ്ഠമായ കാര്യമാണ്​. അദ്ദേഹത്തിന്​ രാഷ്ടീയമില്ല. അദ്ദേഹത്തിനെതി​രെ സൈബർ പോരാളികൾ നടത്തുന്ന യുദ്ധം ഭീകരമാണ്​. യാഥാർഥ്യം തുറന്നുപറഞ്ഞാൽ ക്രൂശിക്കുന്നത്​ ഗുണ്ടരാഷ്ടീയത്തിന്‍റെ മുഖമുദ്രയാണ്​. ഇടതുപക്ഷവും പിണറായി വിജയനും അതാണ്​ നടത്തുന്നത്​. വിഷയത്തിൽ കലാകാരന്മാർ ഇടപെടേ​ണ്ടെന്ന മുന്നറിയിപ്പാണ്​ സി.പി.എം നൽകുന്നത്​. ഭരണസംവിധാനത്തിന്‍റെ പോരായ്മകളെക്കുറിച്ച്​ വിമർശിക്കാനും പ്രതികരിക്കാനും ഓരോ പൗരനും അവകാശമുണ്ട്​. അത്​ നിഷേധിക്കാൻ പത്ത് പിണറായിവന്നാലും നടക്കില്ല. കർഷകർക്കൊപ്പമുള്ള സമരത്തിന്​ കോൺഗ്രസ്​ നേതൃത്വം നൽകും.

പുതുപ്പള്ളിയിൽ​ യു.ഡി.എഫ്​ ചരിത്രപരമായ വിജയം നേടും. ഇടതു സ്ഥാനാർഥിക്ക്​ കിട്ടുന്ന മൊത്തം വോട്ടിന്‍റെ ഭൂരിപക്ഷത്തിൽ കോൺ​ഗ്രസ്​ വിജയിക്കുമെന്നും സുധാകരൻ പറഞ്ഞു.