കെ റെയിൽ: ക്ലിഫ് ഹൗസ് വളപ്പിൽ യുവമോർച്ച പ്രവർത്തകർ സർവേകല്ല് നാട്ടി

തിരുവനന്തപുരം: കെ റെയിലിനെതിരായ ബി.ജെ.പി പ്രതിഷേധത്തിനിടെ ക്ലിഫ് ഹൗസ് വളപ്പിൽ സർവേകല്ല് നാട്ടി. യുവമോർച്ച പ്രവർത്തകരാണ് ക്ലിഫ് ഹൗസ് വളപ്പിലെ മന്ത്രി പി. പ്രസാദിന്‍റെ വസതിക്ക് സമീപം പ്രതീകാത്മകമായി കല്ല് നാട്ടിയത്.

ക്ലിഫ് ഹൗസ് വളപ്പിലെ മതിൽ ചാടിക്കടന്നാണ് യുവമോർച്ച പ്രവർത്തകർ മന്ത്രിയുടെ ഔദ്യോഗിക വസതിക്ക് സമീപമെത്തിയത്. സംഭവത്തിൽ ആറു പ്രവർത്തകരെ പൊലീസ് അറസ്റ്റ് ചെയ്തു. യുവമോർച്ച പ്രവർത്തകരായ പി. ജോയി, പാപ്പനംകോട് നന്ദു, വിജിത്ത്, ഗോകുൽ, പ്രതീഷ്, വിഷ്ണു വിപിൻ എന്നിവരാണ് അറസ്റ്റിലായത്.