കെ.റെയിൽ വരേണ്യവർഗത്തിനായുള്ള പദ്ധതി​; പിണറായി മോദിയെ പോലെ ഏകാധിപതിയാവുന്നുവെന്ന്​ വി.ഡി.സതീശൻ

തിരുവനന്തുരം: കെ.റെയിൽ വരേണ്യവർഗത്തിനായുള്ള പദ്ധതിയാണെന്ന്​ പ്രതിപക്ഷ നേതാവ്​ വി.ഡി.സതീശൻ. പിണറായി മോദിയെ പോലെ ഏകാധിപതിയാവുന്നുവെന്നും സതീശൻ കുറ്റപ്പെടുത്തി. സാധാരണക്കാർക്ക്​ ഗുണകരമല്ലാത്ത പദ്ധതിയാണ്​ കെ.റെയിൽ. പദ്ധതി നടപ്പായാൽ വരും തലമുറകൾക്ക്​ കേരളത്തിൽ ജീവിക്കാൻ കഴിയാത്ത സാഹചര്യമുണ്ടാവുമെന്നും അദ്ദേഹം പറഞ്ഞു.

ഡി.പി.ആർ വിവരങ്ങൾ പുറത്ത് വന്നപ്പോൾ കെ.റെയിൽ എത്ര മാത്രം ജനവിരുദ്ധ പദ്ധതിയാണെന്ന് ബോധ്യപ്പെടുന്നു. ഇടത് പക്ഷം എന്ന് പറഞ്ഞ് അഭിമാനിച്ചു നടക്കുന്നവർക്ക് ഈ പദ്ധതി നടപ്പാക്കാൻ കഴിയുമോ എന്നും അദ്ദേഹം ചോദിച്ചു. സിൽവർ ലൈൻ പദ്ധതിയിൽ സർക്കാറിന്​ അനാവശ്യ ധൃതിയുണ്ട്​. മുഖ്യമന്ത്രി ചോദ്യങ്ങളിൽ നിന്നും ഒളിച്ചോടുകയാണ്​. വിമർശിക്കുന്നവരെ രാജ്യദ്രോഹികളാക്കുന്ന മോദി സർക്കാറിന്‍റെ നയം പിണറായിയും പിന്തുടരുകയാണെന്നും അദ്ദേഹം പറഞ്ഞു.

അതേസമയം, സിൽവർ ലൈനിന്‍റെ സാമൂഹികാഘാത പഠനത്തിന്​ വിജ്ഞാപനം ഇറങ്ങി. 100 ദിവസത്തിനുള്ളിൽ പഠനം പൂർത്തിയാക്കണ​മെന്നാണ്​ നിർദേശം. സർവേ കല്ലിട്ട സ്ഥലങ്ങളിലാണ്​ ആദ്യം പഠനം നടത്തുക. ഇതനുസരിച്ച്​ കണ്ണൂരിലാവും ആദ്യം പഠനത്തിന്​ തുടക്കം കുറിക്കുക.