ജ്യോത്സ്നയുടെ ആത്​മഹത്യ: ജില്ല ഒാഫിസറെയും സൂപ്രണ്ടിനെയും സ്​ഥലം മാറ്റി

കണ്ണൂർ: അഴീക്കോട് സർക്കാർ വൃദ്ധസദനത്തിലെ മേട്രൻ ജ്യോത്സ്​നയുടെ ആത്​മഹത്യക്ക്​ ഉത്തരവാദികളായവർക്കെതിരെ നടപടിയെടുക്കണമെന്ന​ ആവശ്യം ശക്​തമാകുന്നതിനിടെ സാമൂഹികക്ഷേമ വകുപ്പ്​ നടപടി തുടങ്ങി.

ഇതി​െൻറ ഭാഗമായി ജില്ല ഒാഫിസർ പവിത്രൻ തൈക്കണ്ടിയെ കോഴിക്കോ​േട്ടക്കും വൃദ്ധസദനം സൂപ്രണ്ട്​ മോഹനനെ വയനാട്ടിലേക്കും സ്​ഥലം മാറ്റി. വകുപ്പു മന്ത്രി ​കെ.കെ. ശൈലജ ടീച്ചറുടെ നിർദേശത്തെ തുടർന്ന്​ വകുപ്പ്​ സെക്രട്ടറി ബിജു പ്രഭാകരനാണ്​ ഇരുവർക്കുമെതിരെ നടപടിയെടുത്തത്​. സംഭവത്തിൽ ആരോപണ വിധേയരായ ചില ജീവനക്കാർക്കെതിരെയും വകുപ്പുതല നടപടിയുണ്ടാകുമെന്നാണ്​ സൂചന.

ജ്യോത്സ്​നയുടെ ഭർത്താവ്​ കീച്ചേരി പമ്പാല പുതിയപുരയിൽ ഹൗസിൽ പി.പി. മുരളീധരൻ മുഖ്യമന്ത്രിക്കും ജില്ല പൊലീസ്​ മേധാവിക്കും സംഭവത്തിൽ പരാതി നൽകിയിരുന്നു. വൃദ്ധസദനത്തിലെ ജീവനക്കാരുടെ പീഡനത്തെ തുടർന്നാണ്​ ഇവിടത്തെ മേട്രനായ ജ്യോത്സ്​ന ആത്​മഹത്യ ചെയ്​തതെന്നായിരുന്നു ആരോപണം.

സംഭവത്തിൽ കുറ്റക്കാർക്കെതിരെ നടപടിയാവശ്യപ്പെട്ട്​ വിവിധ രാഷ്​ട്രീയ സംഘടനകളും രംഗത്തെത്തി.പരാതിയിൽ പൊലീസും സാമൂഹിക ക്ഷേമ വകുപ്പും അന്വേഷണം നടത്തുന്നുണ്ട്​.

ജ്യോത്സ്​നയുടെ കുടുംബത്തിന്​ നീതി ലഭ്യമാക്കണമെന്നാവശ്യപ്പെട്ട്​ യൂത്ത്​ കോൺഗ്രസ്​ ജില്ല കമ്മിറ്റിയുടെ നേതൃത്വത്തിൽ നിൽപുസമരം നടത്തി.ജ്യോത്സ്​നയെ മരണത്തിലേക്ക് തള്ളിവിട്ടവർക്കെതിരെ നടപടി എടുക്കണമെന്ന് സി.പി.എം പാപ്പിനിശ്ശേരി ഈസ്​റ്റ്​ ലോക്കൽ കമ്മിറ്റി ആവശ്യപ്പെട്ടു​.

വിശദീകരണം തേടാതെ ജ്യോത്സ്​നയെ സസ്പൻഡ്​ ചെയ്ത ജില്ല ഓഫിസറുടെ നടപടി നീതീകരിക്കാൻ കഴിയില്ല. ഇദ്ദേഹം ഈ സ്ഥാപനത്തിലെ സൂപ്രണ്ട് ആയിരുന്ന ഘട്ടം മുതൽ തുടരുന്ന വ്യക്തിവിരോധത്തി​െൻറ തുടർച്ചയാണ് സസ്പൻഷൻ. ഭർത്താവ് മുരളീധരൻ നൽകിയ പരാതിയിൽ പറഞ്ഞ മുഴുവൻ പേർക്കുമെതിരെ ക്രിമിനൽ നടപടി പ്രകാരവും സർവിസ്​ ചട്ടപ്രകാരവും നടപടി കൈക്കൊള്ളണമെന്നും ലോക്കൽ കമ്മിറ്റി ആവശ്യപ്പെട്ടു. മേട്രൻ ജ്യോത്സ്​നയുടെ മരണത്തിൽ ഉന്നതതല അന്വേഷണം നടത്തണമെന്ന്​ ഡി.സി.സി പ്രസിഡൻറ്​ സതീശൻ പാച്ചേനി ആവശ്യപ്പെട്ടു.

ആത്മഹത്യക്ക് കാരണക്കാരായി കുടുംബാംഗങ്ങൾ ആരോപിക്കുന്ന ജില്ല ഓഫിസർക്കെതിരെ ശിക്ഷാ നടപടി സ്വീകരിക്കാതെ സ്ഥലം മാറ്റൽ നടപടി സ്വീകരിച്ച് വിഷയത്തെ ലഘൂകരിക്കാനാണ് ഔദ്യോഗിക സംവിധാനത്തി​െൻറ ശ്രമം. കുടുംബത്തിന് നീതി നൽകുന്നതിനു സർക്കാർ തലത്തിൽ ഇടപെടൽ നടത്തിയില്ലെങ്കിൽ ജനകീയ പ്രക്ഷോഭത്തിന് കോൺഗ്രസ് നേതൃത്വം നൽകുമെന്നും സതീശൻ പാച്ചേനി പ്രസ്താവനയിൽ പറഞ്ഞു.