ഇ-ബുൾ ജെറ്റ് പൊളിയാണെന്ന്​ ജോയ്​ മാത്യു; പലരുടെയും സന്തോഷത്തിന്​ കാരണം അവർക്ക്​ പണി കിട്ടിയതിൽ -ഹരീഷ്​ ശിവരാമകൃഷ്​ണൻ

മോ​ട്ടോർ വാഹനവകുപ്പ്​ ഓഫിസിൽ അതിക്രമം കാണിച്ചെന്ന പരാതിയിൽ പൊലീസ്​ കസ്റ്റഡിയിലെടുത്ത ​വ്​ളോഗർമാരായ ഇ-ബുൾ ജെറ്റ്​ സഹോദരൻമാർക്ക്​ പിന്തുണയുമായി നടൻ ജോയ്​ മാത്യുവും ഗായകൻ ഹരീഷ്​ ശിവരാമകൃഷ്​ണനും.

'കുട്ടികൾ ചില്ലറക്കാരല്ല, ഈ ബുൾ ജെറ്റ് പൊളിയാണ്. മാമൂൽ സാഹിത്യവും മാമാ പത്രപ്രവർത്തനവും ഈ പിള്ളേർ ഉഴുതു മറിക്കുകയാണ്. ഇതിനൊരു പുതുമണ്ണിന്‍റെ മണമുണ്ട്' -ജോയ്​ മാത്യു ഫേസ്​ബുക്കിൽ കുറിച്ചു.

പലരുടെയും സന്തോഷത്തിന്​ കാരണം അവർക്ക്​ പണി കിട്ടി എന്നതിനാലാണെന്ന്​ ഗായകൻ ഹരീഷ്​ ശിവരാമകൃഷ്​ണൻ ഫേസ്​ബുക്കിൽ കുറിച്ചു. 'മോഡിഫൈഡ്​ വണ്ടിക്ക് പൊലീസ് ഫൈൻ അടിച്ചു എന്നതാണോ അതോ ആ ഫ്രീക്ക്​ പിള്ളേർക്ക് ഒരു പണി കിട്ടി എന്നതിലാണോ നമുക്ക് സന്തോഷം എന്ന് മാത്രം മനസ്സിലായില്ല.

നിയമം തെറ്റിച്ചാ ഫൈൻ കിട്ടും, കിട്ടണം. വണ്ടി തോന്നിയ പോലെ മോഡിഫൈ ചെയ്താൽ എം.വി.ഡി ഫൈൻ അടിക്കും. എന്‍റെ കൗതുകം വേറേ ആണ് - പലയിടത്തും കൺവെൻഷനിൽ നിന്ന് മാറി സഞ്ചരിച്ചവർക്ക് ഒരു പണി കിട്ടിയതിലുള്ള ഒരു ക്രൂരമായ സംതൃപ്തി ആണ് പലർക്കും എന്ന് തോന്നി പോവുകയാണ്.

എല്ലാ നിയമ ലംഘനവും കാണുമ്പോ ഉണ്ടാവാത്ത ഒരു പ്രത്യേകതരം നിയമ സ്നേഹം പലയിടത്തും കാണുമ്പോ പഴയ ഒരു കാര്യമാണ്​ ഓർമ വന്നത്​. പണ്ട് ഞാൻ സ്കൂളിൽ പഠിക്കുമ്പോ സൈലൻസർ മോഡിഫൈ ചെയ്ത ബുള്ളറ്റ് കാണുമ്പോ പല അമ്മാവന്മാർക്കും 'ഇവനെ പൊലീസിൽ പിടിപ്പിക്കണം...' എന്ന് തോന്നാറുണ്ടായിരുന്നു. ശബ്​ദ മലിനീകരണം ആണ് കാരണം എന്നൊക്കെ അവർ തള്ളാറുണ്ടായിരുന്നെങ്കിലും, യഥാർത്ഥ കാരണം ഈ 'ചെത്തു' പിള്ളേരെ ഒന്നു നിലയ്ക്കുന്നു നിർത്തണം എന്ന യൗവനം നഷ്​ടപ്പെട്ടവരുടെ ചൊരുക്ക് ആയിരുന്നു.

ഇപ്പോഴത്തെ ഓരോ ട്രോൾ കണ്ടപ്പോൾ ആ അമ്മാവന്മാരെ ഓർമ വന്നു അത്രേ ഉള്ളു... ഇ ബുൾ ജെറ്റ്​ എന്താണെന്ന്​ എനിക്കറിയില്ല. ഇ ബുൾ ജെറ്റിന്​ പിന്തുണയുമായി കവർ ഗായകൻ ഹരീഷ് ശിവരാമൻ എന്ന് ദയവായി ലേഖനം എഴുതരുത്. സ്വന്തമായി ഒരു cow jet പോലും എനിക്ക് ഇല്ല' -ഹരീഷ് കുറിച്ചു.