ജിഷ്​ണു പ്രണോയിയുടെ മരണം ആത്മഹത്യയെന്ന്​ സി.ബി.ഐ

കൊച്ചി: പാമ്പാടി നെ​ഹ്‌​റു കോ​ള​ജ് വി​ദ്യാ​ര്‍ഥിയായിരുന്ന ജി​ഷ്ണു പ്ര​ണോയി​യുടെ മരണം ആത്മഹത്യയായിരുന്നുവ െന്ന്​ സി.ബി.ഐ. 21 മാസം നീണ്ട അന്വേഷണത്തിനൊടുവിലാണ്​ ആത്മഹത്യ പ്രേരണക്ക്​ രണ്ടുപേരെ പ്രതിപ്പട്ടികയിലുൾപ്പെടു ത്തി, ആത്മഹത്യയാണെന്ന അന്തിമനിഗമനത്തിൽ സി.ബി.ഐ എറണാകുളം ചീഫ്​ ജുഡീഷ്യൽ മജിസ്​​ട്രേറ്റ്​ കോടതിയിൽ കുറ്റപത്രം സമർപ്പിച്ചത്​.

കോളജ്​ വൈസ് പ്രിന്‍സിപ്പൽ എന്‍. ശക്തിവേല്‍, ഇന്‍വിജിലേറ്ററും അസി. പ്രഫസറുമായ സി.പി. പ്രവീൺ എന്നിവർക്കെതിരെയാണ്​ ആത്മഹത്യ പ്രേരണക്കുറ്റം ചുമത്തി കുറ്റപത്രം നൽകിയത്​. നെഹ്​റു ഗ്രൂപ്​ ചെയർമാൻ പി. കൃഷ്​ണദാസ്​, പി.ആര്‍.ഒ സഞ്ജിത് വിശ്വനാഥന്‍, പരീക്ഷച്ചുമതലയിലുണ്ടായിരുന്ന അധ്യാപകന്‍ ബിപിന്‍ എന്നിവരെ പ്രതിപ്പട്ടികയിൽനിന്ന്​ ഒഴിവാക്കി. കൂടുതൽ പരിശോധനക്കുശേഷം മാത്രമേ കുറ്റപത്രം കോടതി ഫയലിൽ സ്വീകരിക്കൂ.

2017 ജനുവരി ആറിനാണ്​ ബി.ടെക്​ വിദ്യാർഥി ജിഷ്ണുവിനെ കോളജ് ഹോസ്​റ്റലിൽ ദുരൂഹസാഹചര്യത്തില്‍ മരിച്ചനിലയില്‍ കണ്ടത്. പരീക്ഷയില്‍ കോപ്പിയടിച്ചത് കണ്ടുപിടിച്ചതി​​െൻറ മനോവിഷമത്തില്‍ ആത്മഹത്യ ചെയ്തതാണെന്നായിരുന്നു പൊലീസി​​െൻറ പ്രാഥമികനിഗമനം. എന്നാൽ, കോളജിലെ വിദ്യാർഥികൾ ഇവിടെയുള്ള ഇടിമുറിയെപ്പറ്റി പൊലീസിന്​ മൊഴിനൽകിയതോടെ സംഭവം വിവാദമാവുകയായിരുന്നു. പോസ്​റ്റ്മോര്‍ട്ടത്തില്‍ ജിഷ്ണുവി​​െൻറ കണ്ണിലും മൂക്കിലും രക്തക്കറ കണ്ടെത്തുകയും ചെയ്​തിരുന്നു. ആദ്യം ലോക്കല്‍ പൊലീസും പിന്നീട് ക്രൈംബ്രാഞ്ചും അന്വേഷിച്ചശേഷമാണ്​ കേസ്​ സി.ബി.ഐക്ക്​ വിട്ടത്​.

പഴയന്നൂർ പൊലീസ്​ അസ്വാഭാവിക മരണത്തിന്​ രജിസ്​റ്റർ ചെയ്​ത എഫ്​.​െഎ.ആർ റീ രജിസ്​റ്റർ ചെയ്​താണ്​ 2018 ജനുവരിയിൽ സി.ബി.ഐ തിരുവനന്തപുരം യൂനിറ്റ്​ അന്വേഷണത്തിന്​ തുടക്കംകുറിച്ചത്​. ജിഷ്ണു കോപ്പിയടിച്ചെന്ന അപവാദം പ്രചരിപ്പിച്ചതാണ് ആത്മഹത്യക്ക് ഇടയാക്കിയതെന്നാണ്​ സി.ബി.ഐയുടെ നിഗമനം. കോപ്പിയടിച്ചെന്ന് ജിഷ്ണുവിനെക്കൊണ്ട് ബലമായി എഴുതിവാങ്ങിയതായും അന്വേഷണത്തിൽ വ്യക്തമായി​. ഒഴിവാക്കപ്പെട്ടവർക്ക്​ കുറ്റകൃത്യത്തിൽ എന്തെങ്കിലും ബന്ധമുള്ളതായി കണ്ടെത്താനായിട്ടില്ലെന്ന നിലപാടിലാണ്​ സി.ബി​.ഐ.