വിവാഹനാളിൽ ജിജോക്ക് അന്ത്യയാത്ര...

കോട്ടയം: വിവാഹ ദിവസം കടപ്ലാമറ്റം ഇലക്കാട്​ പള്ളിമുറ്റത്തേക്ക്​ എത്തിയത് ജിജോയുടെ ചേതനയറ്റ ശരീരം​. പങ്കാളിയുടെ കൈപിടിച്ച്​ പുതുജീവിതത്തിലേക്ക്​ ​കടക്കുന്ന​തിന്​ മണിക്കൂറുകൾക്ക്​ മുമ്പാണ്​​ ​വാഹനാപകടത്തിൽ യുവാവിന്​ ദാരുണാന്ത്യം സംഭവിച്ചത്​. ​ബുധനാഴ്ച രാത്രി കാളികാവ് പള്ളിക്കുസമീപം വാനും ബൈക്കും കൂട്ടിയിടിച്ചുണ്ടായ അപകടത്തിലാണ്​ കടപ്ലാമറ്റം വയലാ നെല്ലിക്കുന്ന്​ ഭാഗത്ത്​ കൊച്ചുപാറയില്‍ ജിജോ ജിന്‍സൺ​ (21) മരിച്ചത്​.

ഇലക്കാട്​ പള്ളിയിൽ വ്യാഴാഴ്ച രാവിലെ 10നായിരുന്നു​​ വിവാഹം നിശ്ചയിച്ചിരുന്നത്​. മരണവാർത്തയറിഞ്ഞ്​ പ്രതിശ്രുതവധു ബോധരഹിതയായി. വാർത്ത ഏവരെയും കണ്ണീരിലാഴ്ത്തി. അമ്മയും സഹോദരിമാരും പ്രതിശ്രുതവധുവും ഹൃദയംപൊട്ടുന്ന വേദനയിലാണ് അന്ത്യചുംബനം നൽകി ജിജോയെ യാത്രയാക്കിയത്​.

വിവാഹ ഒരുക്കങ്ങളുമായി ബന്ധപ്പെട്ട കാര്യങ്ങള്‍ക്ക് പോയിവരുന്നതിനിടെ ജിജോ സഞ്ചരിച്ച ബൈക്കില്‍ ട്രാവലർ ഇടിക്കുകയായിരുന്നു. ഒപ്പമുണ്ടായിരുന്ന സുഹൃത്ത് അജിത്തിന് ഗുരുതര പരിക്കേറ്റു.​ ഇരുവരും ഒരുമിച്ച്​ ഫ്ലിപ്​കാർട്ടിലാണ്​ ജോലിചെയ്തിരുന്നത്​.

ജിജോയും പ്രതിശ്രുത വധുവും ഏറെനാളായി പ്രണയത്തിലായിരുന്നു. തുടർന്ന്​ ഇവരുടെ വിവാഹം രജിസ്റ്റർ ചെയ്തിരുന്നു. രണ്ടുവർഷമായി മാതാവ്​ നിഷയുടെ വീട്ടിലാണ്​ ജിജോയും കുടുംബവും താമസിച്ചിരുന്നത്​. വീട്ടിലെ ​സംസ്കാരശുശ്രൂഷകൾക്ക്​ ശേഷം വ്യാഴാഴ്ച വൈകീട്ട്​​ നാലിന്​ ഇലക്കാട് സെന്‍റ്​ മേരീസ് പള്ളി സെമിത്തേരിയിൽ സംസ്കാരം നടത്തി. സഹോദരിമാര്‍: ദിയ, ജീന.