ജയരാജൻ-ജാവദേക്കർ കൂടിക്കാഴ്ച ഡീൽ ഉറപ്പിക്കാനെന്ന് കെ. മുരളീധരൻ

തൃശൂർ: തൃശൂർ ലോക്സഭ മണ്ഡലത്തിലെ ഗുരുവായൂരിലും നാട്ടികയിലും സി.പി.എം വോട്ടുകൾ ബി.ജെ.പിക്ക്​ മറിച്ചിട്ടുണ്ടെന്ന്​ യു.ഡി.എഫ്​ സ്ഥാനാർഥി കെ. മുരളീധരൻ. ഇത്​ മുഖ്യമന്ത്രിയുടെ അറിവോടെയാ​ണെന്നും മുരളീധരൻ മാധ്യമപ്രവർത്തകരോട്​ പറഞ്ഞു.

സി.പി.എം ​നേതാവ്​ ഇ.പി. ജയരാജൻ ബി.ജെ.പി നേതാവ്​ പ്രകാശ്​ ജാവദേക്കറെ കണ്ടത്​ ഇപ്പോൾ പ്രചരിക്കുന്നതു പോലെ ജയരാജന്​ ബി.ജെ.പിയിൽ ചേരാനല്ല, മറിച്ച്​ ലോക്സഭ തെരഞ്ഞെടുപ്പിൽ തൃശൂർ അടക്കമുള്ള മണ്ഡലങ്ങളിൽ സി.പി.എം-ബി.ജെ.പി ഡീൽ ഉറപ്പിക്കാനാണ്​. അത്​ നടപ്പാക്കുകയും ചെയ്തിട്ടുണ്ട്​.

എന്നാൽ, അതൊന്നും യു.ഡി.എഫിന്‍റെ ജയത്തെ ബാധിക്കില്ല. ഒരുപക്ഷേ, ബി.ജെ.പി രണ്ടാം സ്ഥാനത്ത്​ എത്തിയേക്കും. യു.ഡി.എഫ്​ 30,000ത്തിനും 50,000ത്തിനും ഇടക്ക്​ വോട്ടിന്​ ജയിക്കുമെന്നും കെ. മുരളീധരൻ പറഞ്ഞു.