ജയിൽ പരിഷ്‌കരണം: ഹൈകോടതി​ വിശദീകരണം തേടി

കൊച്ചി: ജയിൽ പരിഷ്‌കരണവുമായി ബന്ധപ്പെട്ട സുപ്രീം കോടതി മാർഗ നിർദേശങ്ങളുടെ പശ്ചാത്തലത്തിൽ ഇത്​ സംബന്ധിച്ച്​ ഹൈകോടതി സ്വമേധയാ പൊതുതാൽപര്യ ഹരജി ഫയലിൽ സ്വീകരിച്ചു. തടവിൽ കഴിയവെ അസ്വാഭാവിക മരണം സംഭവിച്ചവരുടെ ഉറ്റവരെ കണ്ടെത്തി മതിയായ നഷ്​ടപരിഹാരം നൽകാൻ ഹൈകോടതികൾ നടപടിയെടുക്കണമെന്ന സുപ്രീം കോടതി ഉത്തരവി​​െൻറ പശ്ചാത്തലത്തിലാണ്​ സ്വമേധയാ ഹരജി. തുടർന്ന്​ സർക്കാറടക്കം എതിർകക്ഷികളോട്​ ഹൈകോടതി വിശദീകരണം തേടി. ചീഫ് സെക്രട്ടറി, ആഭ്യന്തര വകുപ്പ് അഡി. ചീഫ് സെക്രട്ടറി, സാമൂഹിക നീതി വകുപ്പ് സ്പെഷൽ സെക്രട്ടറി, ഡി.ജി.പി, ജയിൽ ഡി.ജി.പി, സാമൂഹിക നീതി വകുപ്പ് ഡയറക്ടർ എന്നിവരാണ്​ വിശദീകരണം നൽകേണ്ടത്​.

പൊലീസ് അതിക്രമം, കസ്​റ്റഡി മരണം തുടങ്ങിയവ തടയണമെന്നാവശ്യപ്പെട്ട് സുപ്രീം കോടതി മുൻ ചീഫ് ജസ്​റ്റിസ് ആർ.സി ലഹോട്ടി സുപ്രീം കോടതിക്ക് എഴുതിയ കത്ത് പൊതുതാൽപര്യ ഹരജിയായി പരിഗണിച്ചാണ്​ സുപ്രീംകോടതി മാർഗ നിർദേശം നൽകിയത്​. ഇതു സംബന്ധിച്ച കത്തും സെപ്​റ്റംബർ 15ലെ സുപ്രീം കോടതിയുത്തരവി​​െൻറ പകർപ്പും ഹൈകോടതിക്ക് ലഭിച്ചിരുന്നു. 1382 ജയിലുകളിലെ മനുഷ്യത്വ രഹിത സാഹചര്യങ്ങൾ എന്ന തലക്കെട്ടിലാണ് സുപ്രീംകോടതിയുടെ കത്ത് ലഭിച്ചതെന്നും ഹരജിയിൽ വ്യക്തമാക്കുന്നു.

സംസ്ഥാന സർക്കാറുകൾക്കും ഹൈകോടതികൾക്കും സംസ്ഥാന ലീഗൽ സർവിസ് അതോറിറ്റികൾക്കുമുള്ള നിർദേശങ്ങളോടെയായിരുന്നു ജയിൽ പരിഷ്‌കരണവുമായി ബന്ധപ്പെട്ട സുപ്രീം കോടതിയുടെ ഉത്തരവുണ്ടായത്​. സാധാരണയിലേതിനേക്കാൾ തടവുകാരുടെ ആത്​മഹത്യാ നിരക്ക്  50 ശതമാനം കൂടുതലാണെന്ന്​ ഹരജിയിൽ പറയുന്നു. ജയിലുകളിൽ നടക്കുന്ന മരണത്തിലെ 71 ശതമാനവും ആത്​മഹത്യയാണ്​. ജയിലുകളിലെ ദുരിത സാഹചര്യവും ആത്​മഹത്യക്ക്​ അനുകൂല സാഹചര്യവുമാണ്​ ഇതിന് കാരണം.