കേരകര്‍ഷക സംഘം സംസ്ഥാന പ്രസിഡൻറ്​ ​െഎ.വി ശശാങ്കൻ നിര്യാതനായി

കോഴിക്കോട്: സി.പി.ഐ മുന്‍ കോഴിക്കോട് ജില്ലാ സെക്രട്ടറിയും കേരകര്‍ഷക സംഘം സംസ്ഥാന പ്രസിഡന്‍റുമായ ഐ.വി. ശശാങ്കന്‍ (68) നിര്യാതനായി. അന്തരിച്ച പ്രശസ്​ത സംവിധായകൻ ​െഎ.വി. ​ശശിയുടെ സഹോദരൻ കൂടിയാണ്​​ ശശാങ്കൻ.

കോഴിക്കോട് നടക്കാവിലെ വസതിയില്‍ വെച്ച് ഇന്നലെ രാത്രി ദേഹാസ്വാസ്ഥ്യം ഉണ്ടായതിനെ തുടര്‍ന്ന് സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. അവിടെ വെച്ചായിരുന്നു അന്ത്യം.

ആള്‍ ഇന്ത്യ കോക്കനട്ട് ഗ്രോവേഴ്സ് ഫെഡറേഷന്‍ ജനറല്‍ സെക്രട്ടറിയായി പ്രവർത്തിച്ചിട്ടുണ്ട്​. രണ്ടു തവണയായി 15 വര്‍ഷത്തിലധികം സി.പി.ഐ കോഴിക്കോട് ജില്ലാ സെക്രട്ടറിയുമായിരുന്നു. സി.പി.ഐ സംസ്ഥാന കൗണ്‍സില്‍ അംഗമായി ഒരുപാട്​ കാലം പ്രവര്‍ത്തിച്ചു.

സി.പി.ഐ പ്രവര്‍ത്തകയും കോഴിക്കോട് കോര്‍പ്പറേഷന്‍ സ്ഥിരം സമിതി അധ്യക്ഷയുമായ ആശയാണ് ഭാര്യ. സ്രാവണ്‍, അനുശ്രീ എന്നിവരാണ്​ മക്കള്‍. ഐ വി സതീഷ് ബാബു സഹോദരനാണ്​.