ദേശീയപാതയിലെ കുഴികൾ അടക്കുന്നത്​ അശാസ്ത്രീയമായി​; അടിയന്തരമായി ഇടപെട്ട്​ ഹൈകോടതി

കൊച്ചി: മണ്ണുത്തി - ഇടപ്പള്ളി ദേശീയപാതയിലെ കുഴികൾ അശാസ്ത്രീയമായി അടക്കുന്നതിൽ അടിയന്തരമായി ഇടപെട്ട്​ ഹൈകോടതി. ദേശീയപാതയിലെ കുഴികളിൽ പാക്കറ്റിലാക്കിയ ടാർ മിക്സിട്ട് കൈക്കോട്ട് ഉപയോഗിച്ച് ഉറപ്പിക്കുകയാണെന്ന മാധ്യമങ്ങളിലെ വാർത്തയുടെ അടിസ്ഥാനത്തിലാണ്​ അവധി ദിവസമായിരുന്നിട്ടും ജസ്റ്റിസ്​ ദേവൻ രാമചന്ദ്രന്‍റെ ഇടപെടലുണ്ടായത്​. കുഴികളടക്കുന്ന നടപടികൾ പരിശോധിച്ച് റിപ്പോർട്ട്​ നൽകാൻ എറണാകുളം, തൃശൂർ ജില്ല കലക്ടർമാർക്ക്​ കോടതി അടിയന്തര നിർദേശം നൽകി. പൊതുമരാമത്ത് വകുപ്പ് അഭിഭാഷകൻ മുഖേനയാണ്​ നിർദേശം കലക്ടർമാർക്ക്​ കൈമാറിയത്​. അറ്റകുറ്റപ്പണി നടക്കുന്ന സ്ഥലത്ത്​ നേരിട്ടെത്തി പരിശോധിച്ച് റിപ്പോർട്ട്​ നൽകാനാണ്​ നിർദേശം.

ദേശീയപാതയിലെ കുഴികൾ ഒരാഴ്ചക്കകം അടക്കാനുള്ള കോടതിയുടെ തിങ്കളാഴ്ചത്തെ അന്ത്യശാസനത്തിന്​ പിന്നാലെ കുഴികൾ അടക്കാനുള്ള നടപടികൾ ആരംഭിച്ചിരുന്നു. എന്നാൽ, ഇത്​ അശാസ്ത്രീയ രീതിയിലാണ്​ നടക്കുന്നതെന്ന്​​ മാധ്യമങ്ങൾ കണ്ടെത്തി വാർത്ത നൽകി. ഇതര സംസ്​ഥാന തൊഴിലാളികൾ മാത്രമാണ് കുഴിയടക്കാൻ എത്തിയതെന്നും ​ദേശീയ പാത അതോറിറ്റി, കരാർ കമ്പനി ഉദ്യോഗസ്ഥരൊന്നും പണി നടക്കുന്ന സ്ഥലത്തുണ്ടായിരുന്നില്ലെന്നും വാർത്തകളിൽ സൂചിപ്പിച്ചിരുന്നു. ഇക്കാര്യം കൂടി കണ​ക്കിലെടുത്താണ്​ അടിയന്തര പരിശോധനക്ക്​ കലക്ടർമാർക്ക്​ നിർദേശം നൽകിയത്​.​

നെടുമ്പാശ്ശേരിയിൽ ദേശീയപാതയിലെ കുഴിയിൽ വീണ് കഴിഞ്ഞ ദിവസം സ്കൂട്ടർ യാത്രക്കാരനായ പറവൂർ സ്വദേശി ഹാഷിം മരിച്ചതിനെ തുടർന്നാണ്​ കോടതിയുടെ ഇടപെടൽ അടിയന്തരമായി ഉണ്ടാവുകയും കുഴികൾ നികത്താനുള്ള നിർദേശങ്ങൾ പുറപ്പെടുവിക്കുകയും ചെയ്തത്​. റോഡുകളിലെ കുഴികൾ അടക്കുന്ന കാര്യത്തിൽ ജില്ല കലക്ടർമാർക്ക്​ കാഴ്ചക്കാരാകാൻ കഴിയില്ലെന്നും നടപടി സ്വീകരിക്കാൻ ബാധ്യസ്ഥരാണെന്നും കഴിഞ്ഞ ദിവസം കോടതി അഭിപ്രായപ്പെട്ടിരുന്നു.