കിഫ്​ബി എന്താണെന്നറിയാത്ത കോമാളികളാണ്​ ഇ.ഡിയിലുള്ളത്​; ഉദ്യോഗസ്​ഥരെ രാഷ്​ട്രീയ ലക്ഷ്യത്തോടെ കേന്ദ്രം ഉപയോഗിക്കുന്നുവെന്ന്​ ഐസക്​

തിരുവനന്തപുരം: ഉദ്യോഗസ്​ഥരെയും അന്വേഷണ ഏജൻസികളെയും രാഷ്​ട്രീയ ലക്ഷ്യത്തോടെ കേന്ദ്രം ഉപയോഗിക്കുകയാണെന്ന്​ സംസ്​ഥാന ധനമന്ത്രി തോമസ്​ ഐസക്​.

കിഫ്​ബി എന്താണെന്നറിയാത്ത കോമാളികളാണ്​ ഇ.ഡിയിലുള്ളതെന്ന്​ തോമസ്​ ഐസക്​ പറഞ്ഞു. നിയമവും ചട്ടവും അറിയാത്ത അന്വേഷണ ഉദ്യോഗസ്​ഥർ വിഡ്ഡിത്തങ്ങൾ എഴുന്നള്ളിക്കുകയാണ്​. കീഴിലുള്ള ഉദ്യേഗസ്​ഥരെ രാഷ്​ട്രീയമായി ഉപയോഗിക്കുകയാണ്​ കേന്ദ്ര ധനമന്ത്രി. അവരുടെ നിർദേശമനുസരിച്ച്​ കേരളത്തിനെതിരെ നടപടിയെടുക്കുകയാണ്​ അന്വേഷണ ഉദ്യോഗസ്​ഥരെന്നും ഐസക്​ പറഞ്ഞു.

കേരളത്തിലെ വികസനത്തെ തകർക്കുകയാണ്​ കിഫ്ബിക്കെതിരായ നീക്കത്തിന്​ പിറകിൽ. കേരളത്തെ തകർക്കാനാണ്​ നീക്കമെങ്കിൽ നേരിടും. വടക്കേ ഇന്ത്യയിലെ കോൺഗ്രസ്​ നേതാക്കളല്ല കേരളത്തിലുള്ളതെന്നും കേന്ദ്രം ഒാർക്കണമെന്നും അദ്ദേഹം പറഞ്ഞു.

സംസ്​ഥാനത്തിന്‍റെ ഉദ്യേഗസ്​ഥരെ അന്വേഷണ ഏജൻസികൾ ഭീഷണിപ്പെടുത്തുകയാണ്​. സംസ്​ഥാനത്തിന്‍റെ ഉദ്യേഗസ്​ഥർ മന്ത്രിസഭയുടെ നിർദേശമനുസരിച്ചാണ്​ പ്രവർത്തിക്കുന്നത്​. അവരുടെ പ്രവർത്തിക്ക്​ ഉത്തരവാദിത്വം ഏൽക്കാൻ ഇവിടെ ആളുണ്ടെന്നും തോമസ്​ ഐസക്​ വാർത്താ സമ്മേളനത്തിൽ പറഞ്ഞു.

ഐ.ആർ.എസ്​ ഉദ്യോഗസ്​ഥനായ മനീഷിന്‍റെ നേതൃത്വത്തിലാണ്​ കിഫ്​ബിക്കെതിരെ നീക്കം നടത്തുന്നത്​. രാജസ്​ഥാനിലെ ബി.ജെ.പി നേതാവിന്‍റെ മകനായ ഇദ്ദേഹത്തിന്‍റെ നേതൃത്വത്തിലാണ്​ കോൺഗ്രസ്​ അടക്കമുള്ള ബി.ജെ.പി ഇതര സർക്കാറുകളെയും നേതാക്കളെയും കേന്ദ്രം വേട്ടയാടുന്നതെന്ന്​ തോമസ്​ ഐസക്​ പറഞ്ഞു.

അ​ന്വേഷണ ഏജൻസികളെ തുടലഴിച്ചുവിടുന്നവരുടെ ഭീഷണിക്ക്​ വഴങ്ങില്ലെന്നും കേരളത്തിൽ ഭരണത്തിലുള്ളത്​ ഇടതുപക്ഷമാണെന്ന്​ കേന്ദ്രം ഒാർക്കണമെന്നും തോമസ്​ ഐസക്​ പറഞ്ഞു.