റിപബ്ലിക് ദിനത്തിൽ കർഷകർക്ക് കൊടുക്കേണ്ട സമ്മാനമാണോ ഇത്? കെ.സി. വേണു​ഗോപാൽ

ന്യൂഡൽഹി: കർഷക റാലിയെ ഡൽഹി പൊലീസ് നടപടിയെ വിമർശിച്ച് കെ. സി വേണു​ഗോപാൽ. ഓരോ ഇന്ത്യക്കാരന്‍റേയും ആത്മാവ് വേദനിച്ച ദിനമാണ് ഇന്ന്. ജയ് ജവാൻ, ജയ് കിസാൻ എന്ന് വിളിക്കുന്ന നാട്ടിൽ റിപ്പബ്ലിക് ദിനത്തിൽ കർഷകർക്ക് കൊടുക്കേണ്ട സമ്മാനമാണോ ഇതെന്ന് വേണു​ഗോപാൽ ചോദിച്ചു.

കർഷകർക്കെതിരെ നടന്ന ആക്രമണങ്ങൾക്ക് കേന്ദ്രസർക്കാർ മാത്രമാണ് ഉത്തരവാദി. പാർലമെന്റിൽ വിഷയം ഉന്നയിക്കുമെന്നും കെ. സി വേണു​ഗോപാൽ പറഞ്ഞു. ലോകത്തിന്റെ മുന്നിൽ രാജ്യം നാണംകെട്ടു. ഇനിയെങ്കിലും വിവാദ നിയമങ്ങൾ കേന്ദ്രസർക്കാർ പിൻവലിക്കണമെന്നും കെ. സി വേണു​ഗോപാൽ കൂട്ടിച്ചേർത്തു.