അധ്യാപകർ ഉത്തരമെഴുതി നൽകി; എൽ.എസ്​.എസ്​ പരീക്ഷയിൽ ക്രമക്കേട്​

തിരുവനന്തപുരം: പൊതുവിദ്യാഭ്യാസ വകുപ്പിന്‍റെ എൽ.എസ്​.എസ്​ സ്​കോളർഷിപ് പരീക്ഷയിൽ വൻ ക്രമക്കേട്​. അധ്യാപകർ ഉത്തരമെഴുതി നൽകിയെന്ന്​ കണ്ടെത്തിയതിനെ തുടർന്ന്​ മൂന്നാർ ഉപജില്ലയിലെ മുഴുവൻ വിദ്യാർഥികളുടെയും പരീക്ഷഫലം പൊതുവിദ്യാഭ്യാസ ഡയറക്​ടർ തടഞ്ഞു. ഉത്തരവാദികളെന്നു കണ്ട്​ മൂന്നാർ എ.ഇ.ഒക്കും ബന്ധ​പ്പെട്ട അധ്യാപകർക്കുമെതിരെ നടപടി തുടങ്ങി.

കഴിഞ്ഞ 21നാണ്​ എൽ.എസ്​.എസ്​, യു.എസ്​.എസ്​ ഫലം പ്രസിദ്ധീകരിച്ചത്​. എൽ.എസ്​.എസിന്​ 10.37 ശതമാനവും യു.എസ്​.എസിന്​ 12.9 ശതമാനവുമായിരുന്നു വിജയം. ഫലം അംഗീകരിക്കാൻ 21ന്​ പരീക്ഷ ബോർഡ്​ യോഗം ചേർന്നപ്പോഴാണ്​ മൂന്നാർ വിദ്യാഭ്യാസ ഉപജില്ലയിൽ മാത്രം വിജയ​ശതമാനം ഉയർന്നുനിൽക്കുന്നതു ശ്രദ്ധയിൽപെട്ടത്​. 75 ശതമാനത്തോളമായിരുന്നു ജയം.

ഉത്തരപേപ്പറിൽ അധ്യാപകർ ഉത്തരം എഴുതിച്ചേർത്തതായി പരിശോധനയിൽ കണ്ടെത്തി. ഇതോടെ മൂന്നാറിൽനിന്ന്​ പരീക്ഷ ജയിച്ച 119 പേരുടെയും ഫലം തടയാൻ ഡയറക്ടർ പരീക്ഷ സെക്രട്ടറിക്ക്​ നിർദേശം നൽകി. വിദ്യാഭ്യാസ വകുപ്പ്​ കൂടുതൽ അന്വേഷണം നടത്തി വരുകയാണ്​. ഉത്തരവാദികൾക്കെതിരെ കർശന നടപടിക്ക്​ നിർദേശം നൽകിയതായി പൊതുവിദ്യാഭ്യാസ പ്രിൻസിപ്പൽ സെക്രട്ടറി എ.പി.എം. മുഹമ്മദ്​ ഹനീഷ്​ അറിയിച്ചു.