ദേശീയപതാകയെ അപമാനിച്ചെന്ന്​; ആപ്​ സംസ്ഥാന പ്രസിഡന്‍റ് ഉൾപ്പെടെ 10 പേർക്കെതിരെ കേസ്​

തിരുവനന്തപുരം: ദേശീയപതാകയെ അപമാനിച്ചതിന് ആം ആദ്മി പാർട്ടി സംസ്ഥാന പ്രസിഡന്റ്‌ വിനോദ് മാത്യു വിൽസൺ അടക്കം 10പേർക്കെതിരെ കേസെടുത്തു. ഡൽഹി മുഖ്യമന്ത്രി കെജ്​രിവാളിന്‍റെ അറസ്റ്റിൽ പ്രതിഷേധിച്ച് ബി.ജെ.പി സംസ്ഥാന കമ്മിറ്റി ഓഫിസിലേക്ക് ബുധനാഴ്ച ആം ആദ്മി പാർട്ടി നടത്തിയ മാർച്ചിലാണ് ദേശീയ പതാകയെ അവഹേളിച്ചത്​.

കിഴക്കേകോട്ടയിൽനിന്ന് അരിസ്​റ്റോ ജങ്ഷനിലേക്ക് പ്രകടനമായി എത്തിയ പ്രവർത്തകർ ദേശീയപതാക റോഡിലിട്ട് ചവിട്ടിയതായി തമ്പാനൂർ പൊലീസിന്‍റെ എഫ്.ഐ.ആറിൽ പറയുന്നു. ഇതിന് പുറമെ ഗതാഗത തടസ്സം സൃഷ്ടിക്കൽ, അനധികൃതമായി സംഘം ചേരൽ എന്നീ കുറ്റങ്ങൾക്കും കേസെടുത്തു. കണ്ടാലറിയാവുന്ന 250 പേർക്കെതിരെയും കേസുണ്ട്.