വോട്ട്​ ചോർച്ച തടയാൻ നിർദേശം; തിരുവനന്തപുരത്തും തൃശൂരിലും നേരിട്ടിറങ്ങി പിണറായി

തിരുവനന്തപുരം: ത്രികോണ മത്സരം നടക്കുന്ന രണ്ടു മണ്ഡലങ്ങളിൽ പാർട്ടി വോട്ട്​ ചോർച്ച തടയാൻ നേരിട്ട്​ ഇടപെട്ട്​ മുഖ്യമന്ത്രി പിണറായി വിജയൻ. തിരുവനന്തപുരം, തൃശൂർ മണ്ഡലങ്ങളിലാണ്​ മുഖ്യമന്ത്രി പാർട്ടി നേതൃത്വത്തിന്​ ജാഗ്രതാ നിർദേശം നൽകിയ

ത്​. തൃശൂരിൽ ഇതിനായി പ്രത്യേക യോഗം വിളിച്ച മുഖ്യമന്ത്രി, തെരഞ്ഞെടുപ്പ്​ പ്രവർത്തനങ്ങളിൽ ഒരുതരത്തിലുള്ള ഉദാസീനതയും പാടില്ലെന്ന്​ നിർദേശം നൽകി. ​വീഴ്ച വരുത്തുന്നവർക്കെതിരെ നടപടി മുന്നറിയിപ്പും നൽകി. ചൊവ്വാഴ്ച തിരുവനന്തപുരത്തും​ യോഗം വിളിച്ചിട്ടുണ്ട്​.

ഇരു മണ്ഡലങ്ങളിലും സി.പി.ഐയാണ്​ മത്സരിക്കുന്നത്​. സാധാരണനിലയിൽ എണ്ണയിട്ട യന്ത്രം കണക്കെ പ്രവർത്തിക്കുന്നതാണ്​ സി.പി.എമ്മിന്‍റെ സംഘടനാ സംവിധാനം. എന്നാൽ, സി.പി.ഐ സീറ്റുകളിൽ പ്രവർത്തനം വേണ്ടത്ര ചടുലമാകാറില്ലെന്നത്​ കാലങ്ങളായുള്ള പരാതിയാണ്​.

പാർട്ടി നേതൃത്വത്തിന്‍റെ ഭാഗത്തുനിന്ന്​ അത്തരമൊരു വീഴ്ച സംഭവിക്കരുതെന്നാണ്​ നേതാക്കളെ പ്രത്യേകം വിളിച്ചിരുത്തി മുഖ്യമന്ത്രി തൃശൂരിൽ പറഞ്ഞത്​. ശക്തമായ ​ത്രികോണ മത്സരത്തിൽ ഇടതുമുന്നണിയുടെ വിജയം ഉറപ്പാക്കാനാണ്​ മുഖ്യമന്ത്രിയുടെ ഇടപെടലെന്ന്​ പാർട്ടി കേന്ദ്രങ്ങൾ പറയുന്നു.

ബി.ജെ.പി വിജയിച്ചേക്കുമെന്ന ഘട്ടം വരുമ്പോൾ അതു​ തടയാൻ ഇടതുപക്ഷത്തിന്‍റെ വോട്ടിൽ ഒരു വിഹിതം കോൺഗ്രസ്​ സ്ഥാനാർഥികൾക്ക്​ മറിക്കാറുണ്ട്​. മുൻകാലങ്ങളിൽ ഇത്തരത്തിൽ ഇടത്​ വോട്ടുകൾ തങ്ങൾക്ക്​ ലഭിച്ചിട്ടുണ്ടെന്ന്​ കോൺഗ്രസ്​ സമ്മതിച്ചിട്ടുമുണ്ട്​.

തിരുവനന്തപുരവും തൃശൂരും കോൺ​ഗ്രസിന്‍റെ സിറ്റിങ്​​ സീറ്റാണ്​. രണ്ടിടത്തും ബി.ജെ.പി ഇക്കുറി വലിയ പ്രതീക്ഷ വെക്കുമ്പോൾ ബി.ജെ.പി വിജയം തടയാൻ ആഗ്രഹിക്കുന്ന വോട്ടുകളെല്ലാം ഇടതുപക്ഷത്തിന്‍റേതുൾപ്പെടെ തങ്ങൾക്ക്​ ലഭിക്കുമെന്നാണ്​ കോൺഗ്രസ്​ സ്ഥാനാർഥികളായ ശശി തരൂരും കെ. മുരളീധരനും പ്രതീക്ഷിക്കുന്നത്​. വോട്ട്​ ചോർച്ച തടയാനുള്ള മുഖ്യമന്ത്രിയുടെ നേരിട്ടുള്ള ഇടപെടൽ ​ഈ പ്രതീക്ഷക്ക്​ കരിനിഴൽ വീഴ്ത്തുന്നതാണ്​.