പിളർപ്പിന്​ പിന്നാലെ ഐ.എൻ.എൽ ദേശീയ നേതാക്കൾ യെച്ചൂരിയെ കണ്ടു

ന്യൂഡൽഹി: ഐ.എൻ.എൽ കേരള ഘടകം പിളർന്നതിന്​ പിന്നാലെ പാർട്ടി അഖിലേന്ത്യാ പ്രസിഡൻറ്​ മുഹമ്മദ്​ സുലൈമാൻ ഉൾപ്പെടെയുള്ള ദേശീയ നേതാക്കൾ സി.പി.എം ജനറൽ സെക്രട്ടറി സീതാറാം യെച്ചൂരിയെ കണ്ട്​ പാർട്ടിയിലെ വിഷയങ്ങൾ ധരിപ്പിച്ചു. ഘടകകക്ഷികളുടെ ആഭ്യന്തര വിഷയങ്ങളിൽ സി.പി.എം ഇടപെടാറില്ലെന്ന്​ യെച്ചൂരി നേതാക്കളോട്​ പ്രതികരിച്ചു.

പാർട്ടിയിലെ പ്രശ്​നങ്ങൾ സംസ്​ഥാന നേതൃത്വം മുഖ്യമന്ത്രിയെയും ഇടതുമുന്നണി കൺവീനറെയും ധരിപ്പിക്കുമെന്നും അഖിലേന്ത്യാ നേതൃത്വമെന്ന നിലയിലാണ്​ കണ്ടതെന്നും യെച്ചൂരിയോട്​ പറഞ്ഞുവെന്ന്​ സുലൈമാൻ വ്യക്​തമാക്കി.

പാർട്ടി യോഗം ബഹിഷ്​കരിച്ചിറങ്ങിയവരെ പുറത്താക്കിയതാണെന്നും പിളർപ്പുണ്ടായിട്ടി​ല്ലെന്നും യെച്ചൂരിയെ ധരിപ്പിച്ചു. ഉത്തർപ്രദേശ്​ നിയമസഭ തെരഞ്ഞെടുപ്പിൽ സി.പി.എമ്മുമായി ചേർന്ന്​ ഒരു മുന്നണിയായി പോകുന്നത്​ സംബന്ധിച്ച്​​ യെച്ചൂരിയുമായി ചർച്ച നടത്തിയെന്നും സുലൈമാൻ പറഞ്ഞു.