ദേവികുളത്ത്​ സ്വതന്ത്രൻ എസ്​. ഗണേഷൻ അണ്ണാ ഡി.എം.കെയിൽ; എൻ.ഡി.എ സ്​ഥാനാർഥിയാകും

ഇടുക്കി: ദേവികുളത്ത്​ സ്വതന്ത്രനായ എസ്​. ഗണേഷൻ എൻ.ഡി.എയുടെ ഔദ്യോഗിക സ്​ഥാനാർഥിയാകും.

അപേക്ഷ ഫോം പൂരിപ്പിച്ചതിലെ പിഴവിനെ തുടർന്ന് ദേവികുളമടക്കം​ മൂന്നിടത്ത്​ എൻ.ഡി.എ സ്ഥാനാർഥികളുടെ പത്രിക തള്ളിയിരുന്നു. ഇതോ​ടെ സ്വതന്ത്ര സ്​ഥാനാർഥിയായി പത്രിക സമർപ്പിച്ച ഗണേഷനെ അണ്ണാ ഡി.എം.കെ സ്വന്തം പാളയത്തിലെത്തിക്കുകയായിരുന്നു.

എ.ഐ.എ.ഡി.എം.കെയുടെ ചിഹ്നം ഗണേശന് നൽകുമെന്നും എൻ.ഡി.എ ജില്ല ചെയർമാൻ കെ.എസ്. അജി അറിയിച്ചു.

ദേവികുളം മണ്ഡലത്തിലെ എ.ഐ.എ.ഡി.എം.കെ സ്ഥാനാർത്ഥിയായിരുന്ന ആർ.എം ധനലക്ഷ്മിയുടെ നാമനിർദേശ പത്രികയായിരുന്നു തള്ളിയത്​. ഫോറം 26 ൽ പൂർണ വിവരങ്ങളില്ലെന്ന് ചൂണ്ടിക്കാട്ടിയാണ് വരണാധികാരി നാമനിർദേശ പത്രിക തള്ളിയത്. ഡമ്മിയുടെ അടക്കം മൂന്ന്​ പേരുടെ പത്രിക ഇവിടെ തള്ളിയിട്ടുണ്ട്​.

ഇതിന് പിന്നാലെയാണ് എസ്. ഗണേശനെ പിന്തുണക്കാൻ എൻ.ഡി.എ തീരുമാനിച്ചത്.