പീഡനം: മുൻ ഇമാമി​െൻറ രണ്ട്​ ബന്ധുക്കൾ റിമാൻഡിൽ

തിരുവനന്തപുരം: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിലെ പ്രതി മുന്‍ ഇമാം ഷെഫീഖ് അൽ ഖാസിമിയെ ഒളിവിൽ പോകാൻ സഹായിച്ച സഹോദരനും ബന്ധുവും റിമാൻഡിൽ. കൂടുതൽ അറസ്​റ്റിനും സാധ്യത. ഇമാമി‍​െൻറ സഹോദരന്‍ അൽഅമീൻ, ബന്ധുവും മറ്റൊരു പള്ളിയിലെ ഇമാമുമായ അഹമ്മദ്​ കബീർ എന്നിവരെയാണ്​ കേസന്വേഷിക്കുന്ന പ്രത്യേക സംഘം അറസ്​റ്റ്​ ചെയ്​ത്​ കോടതിയിൽ ഹാജരാക്കി റിമാൻഡ് ചെയ്തത്​.

ഇമാമിനെ ഒളിവിൽ കഴിയാൻ സഹായിച്ച നൗഷാദ്, സുധീർ, അൽ അമീൻ, അഷറഫ്, അസ്കർ, സലിം കരമന, നവാസ് തോന്നയ്ക്കൽ എന്നിവരെ പൊലീസ് കേസില്‍ പ്രതി ചേർത്തിരുന്നു. സമൂഹമാധ്യമങ്ങളിലൂടെ ഇരയുടെ പേര് വെളിപ്പെടുത്തിയതിന് ഇമാം ഷെഫീക്ക് അൽ ഖാസിമിക്കെതിരെ മറ്റൊരു കേസും രജിസ്​റ്റർ ചെയ്തിട്ടുണ്ട്. ഇമാമിനെ ഒളിവിൽ പോകാൻ സഹായിച്ച മൂന്ന് സഹോദരങ്ങളെ നേരത്തേ കൊച്ചിയിൽനിന്ന്​ പൊലീസ് പിടികൂടിയിരുന്നു. ഇതിൽ ഇപ്പോൾ അറസ്​റ്റിലായ സഹോദരൻ അൽഅമീനുമായി പൊലീസ്​ ബംഗളൂരു ഉൾപ്പെടെ സ്​ഥലങ്ങളിൽ ഇമാമിനായി പരിശോധനയും നടത്തിയിരുന്നു.

സംഭവത്തിനുശേഷം ഷെഫീക്ക്​ കബീറിനൊപ്പം ഒളിവിലായിരുന്നുവെന്നാണ്​ പൊലീസ് പറയുന്നത്​. അതിനുശേഷം സഹോദരനായ നൗഷാദിനൊപ്പം ഒളിവിൽ പോ​െയന്നും പൊലീസ്​ പറയുന്നു. മുൻ ഇമാം രാജ്യം വിട്ടുപോകാൻ സാധ്യതയില്ലെന്നാണ്​ പൊലീസി​​െൻറ നിഗമനം. പെൺകുട്ടി ഇപ്പോൾ ചൈൽഡ് വെൽഫെയർ കമ്മിറ്റിയുടെ സംരക്ഷണയിലാണ്. ഷെഫീക്കിനെതിരെ പൊലീസിൽ പരാതിപ്പെടാൻ പെൺകുട്ടിയുടെ കുടുംബം ആദ്യം തയാറായിരുന്നില്ല. പിന്നീടാണ് പെൺകുട്ടി മൊഴി നൽകിയത്​. ആദ്യം പോക്​സോ നിയമപ്രകാരമായിരുന്നു മുൻ ഇമാമിനെതിരെ കേസ്​ രജിസ്​റ്റർ ചെയ്​തിരുന്നതെങ്കിലും ​െപൺകുട്ടിയുടെ മൊഴിയുടെ അടിസ്​ഥാനത്തിൽ ബലാത്സംഗക്കുറ്റവും ചുമത്തിയിട്ടുണ്ട്​.