പ്രണയം നിരസിച്ചതിന് പെൺകുട്ടികളെ ശല്യം ചെയ്താൽ കടുത്ത ശിക്ഷ ഉറപ്പാക്കും- മുഖ്യമന്ത്രി

തിരുവനന്തപുരം: പ്രണയം നിരസിച്ചതിന്​ പെൺകുട്ടികളെ ശല്യം ചെയ്യുന്നവർക്ക്​ കടുത്ത ശിക്ഷ ഉറപ്പാക്കുമെന്ന്​ മുഖ്യമന്ത്രി നിയമസഭയിൽ. കോതമംഗലത്ത്​ ബി.ഡി.എസ്​ വിദ്യാർഥിനി മാനസയെ വെടിവെച്ച്​ കൊന്ന സംഭവം ഞെട്ടിച്ചു. പെൺകുട്ടികളുടെ സുരക്ഷയുമായി ബന്ധപ്പെട്ട പരാതികളിൽ സ്​റ്റേഷൻ അതിർത്തി പരിഗണിക്കാതെതന്നെ കേസെടുത്ത് തുടരനന്വേഷണത്തിന് ബന്ധപ്പെട്ട സ്​റ്റേഷനിലേക്ക് 24 മണിക്കൂറിനുള്ളിൽ കൈമാറണമെന്ന് നിർദേശിച്ചുണ്ട്. പരാതിക്കാരുടെ താമസയിടങ്ങളിൽ ചെന്ന് പരാതി സ്വീകരിക്കും.

സ്​ത്രീധന പ്രശ്​നങ്ങളിൽ പ്രത്യേക ഘട്ടങ്ങളിലാണ്​ പരാതി ഉയരുന്നത്​. ബാക്കിയെല്ലാം ഇരുകൂട്ടരും തമ്മിലുള്ള ധാരണയിലാണ്​ സംഭവിക്കുന്നത്​. സ്​ത്രീധന വിവാഹങ്ങളിൽ ജനപ്രതിനിധികൾ പ​െങ്കടുക്കരുതെന്ന ഗവർണറുടെ നിർദേശം പാലിച്ച്​ സമൂഹം ഒറ്റപ്പെടുത്തേണ്ടതാണ്​. സ്​ത്രീധനവുമായി ബന്ധപ്പെട്ട പരാതികളിൽ പലതും പിന്നീട് ശാരീരിക പീഡനങ്ങളിലേക്കും കൊലപാതകങ്ങളിലേക്കും എത്തുന്നു. ഇത്തരം പരാതികളിൽ ഇവയുടെ സാധ്യതാപരിശോധന കൂടി ഉറപ്പാക്കും.

സൈബർ സാധ്യത ഉപയോഗിച്ച്​ പെൺകുട്ടികളെ അപകടപ്പെടുത്താൻ ശ്രമിക്കുന്നവർക്കെതിരെ കർശന നടപടി സ്വീകരിക്കും. ആൺകുട്ടികളും പെൺകുട്ടികളും ചതിക്കുഴികളിൽ വീഴുകയാണ്​. രക്ഷാകർത്താക്കൾ പ്രത്യേക ജാഗ്രത പാലിക്കണം. കുട്ടി നല്ലതേ ചെയ്യൂവെന്ന ധാരണ പാടില്ല. അടച്ചിട്ട മുറിയിൽ ഇൻറർനെറ്റ്​ ഒരു കുട്ടിയും ഉപയോഗിക്കാൻ പാടില്ല. എല്ലായ്​പ്പോഴും കാണാൻ സാധിക്കുന്ന മുറി ആകണമെന്നും മുഖ്യമന്ത്രി പറഞ്ഞു.