ഇടുക്കിയിലെ ഇരട്ടക്കൊല: പൊലീസുകാർക്കു നേരെ കത്തിവീശി ഭീതി സൃഷ്​ടിച്ച്​​ പ്രതി -Video

കട്ടപ്പന: ഇടുക്കി വലിയതോവാളയിൽ ഞായറാഴ്​ച രാത്രി 11 മണിയോടെ ഒപ്പം താമസിച്ച അന്തർ സംസ്ഥാന തൊഴിലാളികളായ രണ്ടുപേരെ കഴുത്തറുത്തു കൊലപ്പെടുത്തിയ സംഭവത്തിലെ പ്രതി​യെ പൊലീസ്​ പിടികൂടിയത്​ അതീവ സാഹസികമായി.

കൃത്യം നടത്തിയ ശേഷം രക്ഷപ്പെട്ട ഝാർഖണ്ഡ് ഗോഡ ജില്ലയിലെ പറയ് യാഹൽ സ്വദേശി സഞ്ജയ് ബാസ്കി (30) എന്നയാളെ സമീപത്തെ ഏലക്കാട്ടിൽ വെച്ചാണ്​ അർധ രാത്രിയോടെ പൊലീസ്​ കീഴ്​പ്പെടുത്തിയത്​.

പിടികൂടാൻ ചെന്ന പൊലീസ്​ സംഘത്തിന്​ നേരെ സഞ്ജയ് ബാസ്കി കത്തി വീശി ഭീകരത സൃഷ്​ടിച്ചു. ഏറെ നേരത്തേ പരിശ്രമത്തിനൊടുവിൽ പൊലീസ്​ പ്രതിയെ ബലപ്രയോഗത്തിലൂടെ കീഴ്​പ്പെടുത്തു​കയായിരുന്നു. ഇതിനിടെ ഡിവൈ.എസ്.പി എൻ.സി രാജ്‌മോഹൻ ഉൾപ്പെടെ രണ്ട് പൊലീസുകാർക്ക്​ പരിക്കേൽക്കുകയും ചെയ്​തു.

സാമ്പത്തിക ഇടപാട്​ സംബന്ധിച്ച തർക്കമാണ്​ കൊലയിൽ കലാശിച്ചത്​. ഝാർഖണ്ഡ് ഗോഡ ജില്ലയിലെ ലാറ്റ സ്വദേശികളായ ജംഷ് മറാണ്ടി(32), ഷുക്ക് ലാൽ മറാണ്ടി (43) എന്നിവരാണ്​ കൊല്ലപ്പെട്ടത്​. ആക്രമണം തടയാൻ ശ്രമിക്കുന്നതിനിടെ ഷുക്ക് ലാലിൻെറ ഭാര്യ വാസന്തിയുടെ തലക്ക്​ വെട്ടേറ്റു. ഇവരെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്​.