ട്രെയിനിൽ മർദനമേറ്റയാളെ തിരിച്ചറിഞ്ഞു; സ്ഥിരം കുറ്റവാളിയെന്ന്​ പൊലീസ്​

കണ്ണൂർ: മാവേലി എക്സ്​പ്രസ്സിൽ കഴിഞ്ഞ ദിവസം പൊലീസിന്‍റെ​ അതിക്രമത്തിന്​ ഇരയായ വ്യക്​തിയെ തിരിച്ചറിഞ്ഞു. കൂത്തുപറമ്പ്​ സ്വദേശി പൊന്നൻ ഷമീറാണ്​ ഇതെന്ന്​ പൊലീസ്​ അറിയിച്ചു. ഇയാൾ സ്ഥിരം കുറ്റവാളിയാണെന്നാണ് പൊലീസ് പറയുന്നത്. ഇയാളെ കണ്ടെത്താനായിട്ടില്ല. ഫോട്ടോ കണ്ട ബന്ധുക്കളാണ് തിരിച്ചറിഞ്ഞത്.

ഷമീറിനെ റെയിൽവേ പൊലീസ്​ എ.എസ്​.ഐ എം.സി. പ്രമോദ്​ ട്രെയിനിൽ വെച്ച്​ നെഞ്ചിൽ ചവിട്ടുന്ന ദൃശ്യങ്ങൾ പുറത്തു വന്നിരുന്നു. ഇതേതുടർന്ന്​ എ.എസ്​.ഐയെ സസ്​പെന്‍റ്​ ചെയ്തിരുന്നു. ബൂട്ടിട്ട് ചവിട്ടിയ സംഭവം വലിയ വിവാദമാകുകയും മനുഷ്യാവകാശ കമീഷൻ സ്വമേധയാ കേസെടുക്കുകയും ചെയ്തിരുന്നു. ഇതിനിടെയാണ്​ ചവിട്ടേറ്റയാൾ സ്ഥിരം കുറ്റവാളിയാണെന്നും ഇയാളെ തിരിച്ചറിഞ്ഞതായും പൊലീസ്​ അറിയിച്ചത്​.

2011, 2016 കാലയളവിൽ മാല മോഷണം, ക്ഷേത്ര ഭണ്ഡാരം കവർച്ച എന്നിവയടക്കം ഇയാൾക്കെതിരെ വിവിധ പൊലീസ്​ സ്​റ്റേഷനുകളിലായി അഞ്ച് കേസുകൾ നിലവിലുള്ളതായും പൊലീസ്​ അറിയിച്ചു. സ്ഥിരം മദ്യപാനിയാണ്​ ഇയാളെന്നും പൊലീസ് പറയുന്നു. മദ്യപിച്ച്​ സ്ത്രീകളെ ശല്ല്യം ചെയ്​തതിനാണ്​ ഇയാളെ ട്രെയിനിൽ നിന്ന്​ ഇറക്കി വിട്ടതെന്നായിരുന്നു എ.എസ്​.ഐയുടെ വിശദീകരണം.