80:20 അനുപാതം കോടതിയെ ബോധിപ്പിക്കുന്നതിൽ പിഴവ്​ പറ്റി -പാലോളി മുഹമ്മദ്​ കുട്ടി

തിരുവനന്തപുരം: സച്ചാർ, പാലോളി കമീഷനുകളുടെ റിപ്പോർട്ട്​ അനുസരിച്ച്​ മുസ്​ലിംകൾക്ക്​ ഏർപ്പെടുത്തിയ ന്യൂനപക്ഷ സ്​കോളർഷിപ്പിലെ 80:20 അനുപാതം കോടതിയെ ബോധിപ്പിക്കുന്നതിൽ പിഴവുപറ്റിയതായി സംശയിക്കുന്നുവെന്ന്​ മുൻമന്ത്രിയും സി.പി.എം നേതാവുമായ പാലോളി മുഹമ്മദ്​ കുട്ടി.

ന്യൂനപക്ഷങ്ങൾക്ക്​ പൊതുവായി ആവിഷ്​കരിച്ച പദ്ധതി ഒരുവിഭാഗത്തിന്​ കൂടുതൽ നൽകി എന്നാണ് കോടതി വിധി കണ്ടവർക്ക്​ തോന്നുക. എന്നാൽ, അതല്ല കാര്യം. സച്ചാർ കമ്മീഷൻ റിപ്പോർട്ട്​ പ്രകാരം മുസ്​ലിംകൾക്ക്​ തുടങ്ങിയ പദ്ധതിയിൽ മറ്റുള്ള വിഭാഗങ്ങളെ കൂടി ഉൾപ്പെടുത്തുകയായിരുന്നു. ഇക്കാര്യം കോടതിയെ ബോധിപ്പിക്കുന്നതിൽ വീഴ്ച ഉണ്ടായോ എന്ന്​ സംശയിക്കേണ്ടിയിരിക്കുന്നു. അതിനാലാണ്​ 80:20 അനുപാതം റദ്ദാക്കി ജനസംഖ്യാപനുപാതികമായി പുനക്രമീകരിക്കാനുള്ള വിധിക്ക്​ സാഹചര്യമൊരുങ്ങിയത്​ -അദ്ദേഹം പറഞ്ഞു.

ആ സമയത്ത്​ മുസ്​ലിംകൾ വിദ്യാഭ്യാസപരമായി​ വളരെ പിന്നിലാണ്​ എന്ന്​ ബോധ്യ​പ്പെട്ടതിന്‍റെ പശ്​ചാത്തലത്തിലാണ്​ സച്ചാർ കമീഷൻ റിപ്പോർട്ടിൽ മുസ്​ലിംകൾക്ക്​ പ്രത്യേക പദ്ധതികൾ നിർദേശിച്ചത്​. ഇത്​ നടപ്പാക്കു​​േമ്പാൾ മറ്റുള്ള അവശവിഭാഗങ്ങ​െളയും പരിഗണിക്കാമെന്ന തീരുമാനത്തിലാണ്​ 80:20 അനുപാതം ഉൾപ്പെടുത്തിയത്​​. 2011ലാണ്​ സ്​കോളർഷിപ്പിൽ മറ്റുവിഭാഗങ്ങളെ ഉൾപ്പെടുത്തുന്നത്​ സംബന്ധിച്ച്​ തീരുമാനമെടുത്തത്​. എന്നാൽ, അന്നത്തെ എൽ.ഡി.എഫ്​ സർക്കാറിന്‍റെ അവസാനഘട്ടമായതിനാൽ ഇത്​ നടപ്പാക്കാനായില്ല. തുടർന്നുവന്ന യു.ഡി.എഫ്​ സർക്കാറാണ്​ നടപ്പാക്കിയത്​. അന്നൊന്നും ആർക്കും ഒരുപരാതിയും ഇത്​ സംബന്ധിച്ച്​ ഉണ്ടായില്ല. തുടർന്നുവന്ന ഇടതുസർക്കാറിന്‍റെ അവസാന ഘട്ടത്തിലാണ്​ ഇതേക്കുറിച്ച്​ വിവാദമുയർന്നത്​.

100 ശതമാനം തങ്ങൾക്കർഹതപ്പെട്ട പദ്ധതി മറ്റുള്ളവർക്ക്​ നൽകുന്നുവെന്ന്​ ഒരുവിഭാഗവും 80 ശതമാനം ഒരുവിഭാഗത്തിന്​ നൽകുന്നുവെന്ന്​ മറുവിഭാഗവും പറഞ്ഞു. എന്നാൽ, ഇന്നലെ മുഖ്യമന്ത്രി വ്യക്​തമാക്കിയത്​ പോലെ നിലവിൽ കിട്ടുന്നവർക്ക്​ യാതൊരു കുറവും വരുത്താതെയാണ്​ സർക്കാറിന്‍റെ തീരുമാനം. കിട്ടിക്കൊണ്ടിരിക്കുന്ന സ്​കോളർഷിപ്പുകൾ തുടർന്നും ലഭിക്കും. ഇത്​ സ്വാഗതാർഹമായ തീരുമാനമാണെന്നും പാലോളി മുഹമ്മദ്​ കുട്ടി പറഞ്ഞു.