കേരളത്തിൽ ഹൈഡ്രജൻ ഫില്ലിങ്​ സ്റ്റേഷനുകൾ തുടങ്ങുമെന്ന്​ പെ​ട്രോളിയം സഹമ​ന്ത്രി

തിരുവനന്തപുരം: കേരളത്തിൽ ഹൈഡ്രജൻ ഫില്ലിങ്​ സ്റ്റേഷനുകൾ തുടങ്ങുമെന്ന്​ പെ​ട്രോളിയം സഹമ​ന്ത്രി രാമേശ്വർ ടെല്ലി. ഇലക്ട്രിക് വാഹന മേഖലയിലെ പുത്തന്‍ സാങ്കേതികവിദ്യയും വൈദ്യുതി വാഹനങ്ങളും പരിചയപ്പെടുത്തി മോട്ടോർ വാഹന വകുപ്പ് സംഘടിപ്പിക്കുന്ന ശിൽപശാല ‘ഇവോൾവ് - 2023’ ന്‍റെ രണ്ടാം ദിവസത്തിൽ പങ്കെടുത്ത് സംസാരിക്കുകയായിരുന്നു അദ്ദേഹം. പ്രകൃതി സൗഹൃദ ഇന്ധനങ്ങൾ ഉപയോഗിക്കുന്നതിൽ കേരളം മുൻപന്തിയിലാണ്​. ഇക്കാര്യത്തിൽ കേരള സർക്കാറിനെ പ്രത്യേകമായി അഭിനന്ദിക്കുന്നുവെന്നും മന്ത്രി പറഞ്ഞു.

ഫോസില്‍ ഇന്ധനങ്ങളുണ്ടാക്കുന്ന പരിസ്ഥിതി മലിനീകരണം മറികടക്കാന്‍ പുത്തന്‍ സാങ്കേതിക വിദ്യകള്‍ പരിചയപ്പെടുത്തുകയാണ് ഹോട്ടല്‍ ഹയാത്ത് റീജന്‍സിയില്‍ പുരോഗമിക്കുന്ന ശില്‍പശാലയുടെ ലക്ഷ്യം. ഇ-മൊബിലിറ്റി, പൊതുഗതാഗതമേഖലകളിലെ വിദഗ്ധരാണ്​ വിവിധ സെഷനുകളില്‍ പങ്കെടുക്കുന്നത്​.

മന്ത്രി ആന്റണി രാജു, അഡീഷനൽ ചീഫ് സെക്രട്ടറി ജ്യോതിലാൽ, ഗതാഗത കമീഷണർ എസ്. ശ്രീജിത്ത്, അഡീഷനൽ ട്രാൻസ്പോർട്ട് കമീഷണർ പ്രമോജ് ശങ്കർ ​തുടങ്ങിയവർ രണ്ടാംദിവസത്തിൽ പ​​​ങ്കെടുത്തു. ശിൽപശാലയുടെ ഭാഗമായി തൈക്കാട് ​െപാലീസ് ഗ്രൗണ്ടിൽ ഇ-വാഹനങ്ങളുടെ പ്രദര്‍ശനം ഒരുക്കിയിട്ടുണ്ട്​. ശില്‍പശാല 21ന് സമാപിക്കും. സമാപന സമ്മേളനം കേന്ദ്ര ഊര്‍ജമന്ത്രി ആര്‍.കെ. സിങ് ഉദ്ഘാടനം ചെയ്യും.