മകളെ പീഡിപ്പിച്ചെന്ന്​ യുവതിക്കെതിരെ ഭർത്താവിന്റെ പരാതി; ആശ്ചര്യം പ്രകടിപ്പിച്ച്​ ഹൈ​കോടതി

കൊച്ചി: ഒന്നര വയസ്സുള്ള സ്വന്തം കുഞ്ഞിനെ പീഡിപ്പിച്ചെന്ന്​ ആരോപിച്ച്​ ഭാര്യക്കെതിരെ പോക്സോ നിയമപ്രകാരം നൽകിയ പരാതി തെറ്റെന്ന് തെളിഞ്ഞാൽ ഭർത്താവിനെതിരെ നടപടി വേണമെന്ന് നിർദേശിച്ച്​ ഹൈകോടതി. കേട്ടു കേൾവിയുടെ അടിസ്ഥാനത്തിൽ ഭർത്താവ്​ നൽകിയ പരാതിയിന്മേൽ കേസെടുത്ത പൊലീസിന്‍റെ നടപടിയിലും ജസ്​റ്റിസ് പി.വി. കുഞ്ഞികൃഷ്ണൻ ആശ്ചര്യം പ്രകടിപ്പിച്ചു. വൈവാഹിക തർക്കം നാടിന്​ നാണക്കേടുണ്ടാക്കുന്ന തരത്തിലായെന്നും കോടതി നിരീക്ഷിച്ചു.

ഇപ്പോഴും മുലകുടി മാറാത്ത മകളെ പീഡിപ്പിച്ചെന്ന് ആരോപിച്ച് ഭർത്താവ് നൽകിയ പരാതിയിൽ തൃശൂർ കൊടുങ്ങല്ലൂർ പൊലീസ് രജിസ്റ്റർ ചെയ്ത പോക്സോ കേസിൽ യുവതിക്ക്​ മുൻകൂർ ജാമ്യം അനുവദിച്ച ഉത്തരവിലാണ് കോടതിയുടെ നിരീക്ഷണം. ഹരജിക്കാരിയും ഭർത്താവും തമ്മിൽ വൈവാഹിക തർക്കത്തിന്​ പുറമെ കുട്ടിയുടെ കസ്റ്റഡി സംബന്ധിച്ച കേസും നിലവിലുണ്ട്. ഇതിനിടയിലാണ് കുട്ടിക്കുനേരെ യുവതിയിൽനിന്ന് ലൈംഗികാതിക്രമം ഉണ്ടായെന്ന് ഭർത്താവ്​ പരാതി നൽകിയത്.

കുട്ടിയെ അമ്മ ലൈംഗികാതിക്രമത്തിന് ഇരയാക്കിയെന്ന്​ മറ്റൊരു സ്ത്രീ പറഞ്ഞുവെന്നതിന്‍റെ അടിസ്ഥാനത്തിലായിരുന്നു പരാതി. പോക്സോ വകുപ്പ് ഉൾപ്പെടുത്തി കേസ് രജിസ്റ്റർ ചെയ്തതും ഈ കേട്ടുകേൾവിയു​ടെ അടിസ്ഥാനത്തിലാണ്​. കൂടുതൽ അന്വേഷണം ആവശ്യമാണെന്ന്​ സബ്​ ഇൻസ്​പെക്ടർ തന്നെ കോടതിയിൽ പറഞ്ഞിട്ടുള്ളതായി കോടതി ചൂണ്ടിക്കാട്ടി. പരാതിക്കാരന്‍റെ മൊഴി അന്വേഷണ ഉദ്യോഗസ്ഥൻ തന്നെ വിശ്വസിച്ചിട്ടില്ലെന്നാണ് ഇതിൽനിന്ന് വ്യക്തമാകുന്നത്​.

സ്ത്രീകൾ പുരുഷന്മാർക്കെതിരെ നൽകുന്ന പരാതി മാത്രമല്ല, പുരുഷന്മാർ സ്ത്രീകൾക്കെതിരെ നൽകുന്ന പരാതിയും എപ്പോഴും ശരിയാകണമെന്നില്ല. അതിനാൽ, പരാതിയിൽ ഏകപക്ഷീയ അന്വേഷണം പാടില്ല. കുട്ടിയെ ഭർത്താവ് ബലമായി കൊണ്ടുപോയെന്ന്​ ഹരജിക്കാരി പരാതി നൽകിയിരുന്നു. ഇതിൽ പൊലീസ്​ നടപടിയെടുത്തില്ല. ഇതിനുശേഷമാണ്​ ഭർത്താവിന്‍റെ പരാതിയുണ്ടായത്​. അതിൽ കേസ്​ രജിസ്റ്റർ ചെയ്തു. ഇക്കാര്യങ്ങളെല്ലാം പരിഗണിച്ചാണ്​ കോടതി ഹരജിക്കാരിക്ക്​ മുൻകൂർ ജാമ്യം അനുവദിച്ചത്​. അറസ്റ്റ് ചെയ്താൽ 50,000 രൂപയുടെ ബോണ്ട്​ അടിസ്ഥാനത്തിൽ ജാമ്യത്തിൽ വിടണമെന്ന്​ കോടതി ഉത്തരവിട്ടു. തുടർന്നാണ്​ പരാതി വ്യാജമാണെങ്കിൽ ഭർത്താവിനെതിരെ നടപടിക്കും നിർദേശിച്ചത്​.