തിളച്ച കഞ്ഞിയിൽ തല മുക്കി ഭാര്യയെ കൊല്ലാൻ ശ്രമം; തൃശൂരിൽ യുവാവ് അറസ്റ്റിൽ

തൃശൂർ: ഭാര്യയെ ഗുരുതരമായി പരിക്കേൽപ്പിച്ച് കൊല്ലാൻ ശ്രമിച്ചകേസിൽ ഭർത്താവ് അറസ്റ്റിൽ. കുറ്റിച്ചിറ വെട്ടിക്കുഴി പുലികുന്നേൽ വീട്ടിൽ ഡെറിനെ(30) ആണ് പൊലീസ് അറസ്റ്റ് ചെയ്തത്.

യുവതി സ്വന്തം വീട്ടിലേക്ക് പോകണമെന്ന് പറഞ്ഞതിന്റെ വിരോധത്തിലാണ് ആക്രമണം. യുവതിയുടെ മുഖത്തടിച്ച് കഴുത്ത് ഞെക്കി പിടിച്ച് അടുക്കളയിലേക്ക് തള്ളിക്കൊണ്ടുപോയി അവിടെ ഉണ്ടായിരുന്ന തിളച്ച കഞ്ഞിയിലേക്ക് മുഖം മുക്കിപ്പിടിച്ചു. ഗുരുതരമായി പരിക്കേറ്റ യുവതി ചാലക്കുടി താലൂക്ക് ആശുപത്രിയില്‍ ചികിത്സയിലാണ്.

സംഭവത്തിനു ശേഷം ഒളിവിൽ പോയ ഡെറിനെ തൃശ്ശൂർ റൂറൽ ജില്ലാ പൊലീസ് മേധാവി ബി. കൃഷ്ണകുമാർ ഐ.പി.എസിന് കിട്ടിയ രഹസ്യ വിവരത്തിന്റെ അടിസ്ഥാനത്തിലാണ് പിടികൂടിയത്. ഇയാൾ നിരവധി ക്രിമിനൽ കേസിലെ പ്രതിയാണെന്നാണ് പൊലീസ് പറയുന്നത്.