'വിദ്യാർഥിനിയെ ചവിട്ടിവീഴ്ത്തിയ കാടത്തത്തിനെതിരെ മുടി മുറിച്ച്​ പ്രതിഷേധം'; സി.എം.എസ്​ കോളജിൽ വിദ്യാർഥികളുടെ മനുഷ്യമതിൽ

കോട്ടയം: ''എന്‍റെ അച്ഛൻ ചോദിച്ചു, നിങ്ങളുടെ കോളജിലെയൊരു കുട്ടിയെ ചവിട്ടിവീഴ്ത്തിയിട്ട്​ നിങ്ങൾക്ക്​ പ്രതിഷേധമൊന്നുമില്ലേ, എന്ത്​ പറയണമെന്നറിയാതെ ചൂളിപ്പോയി. സംഭവം ഞാൻ അറിഞ്ഞിരുന്നില്ല. അതൊരു നീറ്റലായി. തന്നെക്കൊണ്ട്​ ചെയ്യാൻ കഴിയുന്നത്​ ചെയ്യണമെന്ന്​ തോന്നി. തലമുടി മുറിക്കാനാണ്​ തോന്നിയത്​. അല്ലാതെ മറ്റൊന്നും എന്‍റെ കൈയിൽ ഉണ്ടായിരുന്നുമില്ല''- ​കോട്ടയം നഗരമധ്യത്തിൽ വിദ്യാർഥിനിയെയും സുഹൃത്തിനെയും ചവിട്ടിവീഴ്ത്തിയ സദാചാര ഗുണ്ടായിസത്തിൽ പ്രതിഷേധിച്ച്​ മുറിച്ച തലമുടിയുമായി​ അഞ്ജന കാതറിൻ ഇതുപറയുമ്പോൾ സഹപാഠികൾ ആരവത്തോടെ അവൾക്കൊപ്പം ചേർന്നുനിന്നു.

ബുധനാഴ്ച രാവിലെയാണ്​ കോട്ടയം സി.എം.എസ്​ കോളജ്​ അപൂർവ പ്രതിഷേധത്തിന്​ വേദിയായത്​. കോട്ടയം സി.എം.എസ്​ കോളജ്​ വിദ്യാർഥിനിക്കും സുഹൃത്തിനുമുണ്ടായ ആക്രമണത്തിനെതിരെയായിരുന്നു രണ്ടാംവർഷ ഇംഗ്ലീഷ്​ ബിരുദ വിദ്യാർഥി അഞ്ജന കാതറിൻ മുടിമുറിച്ച്​ പ്രതിഷേധിച്ചത്​. അഞ്ജനയുടെ തീരുമാനത്തിനൊപ്പം ക്ലാസിലെ മറ്റ്​ കുട്ടികളും കട്ടക്ക്​ നിന്നതോടെ, കാമ്പസ്​ ഇതുവരെ കാണാത്ത പ്രതിഷേധത്തിന്​ കോളജ്​ ഗ്രേറ്റ്​ ഹാൾ വേദിയായി.

ബുധനാഴ്ച രാവിലെ മുടിമുറിച്ച അഞ്ജന, സഹപാഠികൾക്കൊപ്പം ചേർന്ന്​ ഇത്​ ഗ്രേറ്റ്​ ഹാളിന്‍റെ വരാന്തയിൽ കെട്ടിത്തൂക്കി. അവർക്കൊപ്പമെന്ന ​ബാഡ്ജും ഒപ്പം ചേർത്തു. മനുഷ്യനല്ലേ, ഞാൻ മിണ്ടിയി​ല്ലെങ്കിൽ പിന്നെ ആരാണ്​. നമ്മുടെ കൂട്ടത്തിൽ ഒരാൾക്കുനേരെ അതിക്രമം ഉണ്ടാകുമ്പോൾ നമ്മൾ പ്രതിഷേധിക്കേണ്ടേ. അണ്ണാറക്കണ്ണനും തന്നാലയത്​. മറ്റുള്ളവരിലേക്ക്​​ ഒരു സന്ദേശം എത്തിക്കാൻ കഴിഞ്ഞാൽ അതുതന്നെ വലിയകാര്യം.

ഞങ്ങളുടെ ബാച്ചിലുള്ളതല്ലെങ്കിലും അക്രമിക്കപ്പെട്ട വിദ്യാർഥിക്കൊപ്പം നിൽക്കേണ്ടത്​ ഞങ്ങളുടെ ബാധ്യതയാണെന്ന്​ തോന്നി. സഹപാഠിക​ളെല്ലാം പൂർണപിന്തുണയുമായി ഒപ്പമുണ്ട്​ -പായിപ്പാട്​ സ്വദേശിയായ അഞ്ജന പറഞ്ഞു. രണ്ടാംവർഷ ഇംഗ്ലീഷ്​ ബിരുദ വിദ്യാർഥികൾ പോസ്റ്റർ തയാറാക്കുകയും ഇതിൽ കൂട്ടമായി ഒപ്പ്​ വെക്കുകയും ചെയ്തു.

അധികം കഴിയും മുമ്പ്​ അഞ്ജന കൊളുത്തിയ പ്രതിഷേധജ്വാല കാമ്പസിൽ പടർന്നുകയറി. വൈകീട്ട്​ കോളജിലെ മുഴുവൻ വിദ്യാർഥികളും അവളെ ചവിട്ടിവീഴ്ത്തിയ കാടത്തത്തിനെതിരെ കാമ്പസിൽ അണിനിരന്നു. അക്രമികൾക്ക്​ താക്കീതായി വിദ്യാർഥികൾ കോളജിനുചുറ്റും വൻ മനുഷ്യമതിൽ തീർത്തു. ഇതിനിടെ കൂടുതൽ വിദ്യാർഥികൾ മുടിമുറിക്കുകയും ചെയ്തു. അഞ്ജനയുടെ മുടിക്കൊപ്പം ഇവരുടേത്​ ചേർത്തുവെ​ച്ചു. കോളജും അധ്യാപകരും ഒപ്പംനിന്നതോടെ അക്രമികൾക്ക്​ ഇത്​ താക്കീതായി.

തിങ്കളാഴ്ച രാത്രി 11നായിരുന്നു കോട്ടയം നഗരമധ്യത്തിലെ തിരുനക്കരയിൽ അക്ഷരനഗരിയെ ലജ്ജിപ്പിച്ച സംഭവമുണ്ടായത്​. തട്ടുകടയിൽനിന്ന്​ ഭക്ഷണം കഴിക്കാനെത്തിയ വിദ്യാർഥിനിയെയും സുഹൃത്തിനെയുമാണ്​ ലൈംഗിക ചുവയോടെ സംസാരിച്ചശേഷം മൂന്നംഗസംഘം ക്രൂരമായി ആക്രമിച്ചത്​. 50ഓളം പേർ കാഴ്ചക്കാരായി ഉണ്ടായിരുന്നെങ്കിലും ആരും രക്ഷിക്കാൻ ശ്രമി​ച്ചില്ലെന്നും ആക്രമണത്തിന്​ ഇരയായവർ പരാതിപ്പെട്ടിരുന്നു. സംഭവത്തിൽ പ്രതികളെ പൊലീസ്​ അറസ്റ്റ്​ ചെയ്തു.