വീട്ടിൽ അതിക്രമിച്ച്​ കയറി അഞ്ചരപ്പവൻ കവർന്നു; മോഷ്​ടാവിന്‍റെ ആക്രമണത്തിൽ വീട്ടമ്മയുടെ കണ്ണിന്​ ഗുരുതര പരിക്ക്​

ചെന്ത്രാപ്പിന്നി (തൃശൂർ): വീട്ടമ്മയെ ആക്രമിച്ച് അഞ്ചര പവന്‍റെ സ്വർണമാല കവർന്നു. ചെന്ത്രാപ്പിന്നി ഭഗവതി പറമ്പിൽ ക്ഷേത്രത്തിന് സമീപം താമസിക്കുന്ന മാരാത്ത് ശശിധരന്‍റെ ഭാര്യ രാധയുടെ സ്വർണമാലയാണ് കവർന്നത്. മോഷ്​ടാ​വിന്‍റെ ആക്രമണത്തിൽ കണ്ണിന് സാരമായി പരിക്കേറ്റ രാധയെ ഇരിങ്ങാലക്കുട താലൂക്ക് ആശുപത്രിയിൽ പ്രവേശിപ്പിച്ചു.

തിങ്കളാഴ്ച പുലർച്ചെ 5.45നാണ്​ സംഭവം. ശശിധരൻ പ്രഭാത നടത്തത്തിന് പോയ സമയത്താണ് ആക്രമണം. വീടിന്‍റെ മുൻവശത്തെ വാതിൽ പൂട്ടാതെയാണ് ശശിധരൻ നടക്കാനിറങ്ങിയത്. ഈ സമയത്ത് മോഷ്​ടാവ് മാരകായുധവുമായി അകത്ത് കടന്ന് മുറിയിൽ ഉറങ്ങിക്കിടന്ന രാധയെ ആക്രമിച്ച് മാല കവരുകയായിരുന്നു. കണ്ണിന് അടിക്കുകയും വെട്ടുകത്തി കാണിച്ച് ഭീഷണിപ്പെടുത്തുകയും ചെയ്​തു.

രാധ വെട്ടുകത്തിയിൽ പിടികൂടിയതോടെ, ബലപ്രയോഗത്തിനിടയിൽ വലത്​ കണ്ണിനും ചുണ്ടിനും കൈവിരലിനും പരിക്കേറ്റു. ഇവർ ഉറക്കെ കരഞ്ഞതോടെ മോഷ്​ടാവ് ഓടി രക്ഷപ്പെടുകയായിരുന്നു. ശബ്​ദം കേട്ട് ഓടിയെത്തിയ അയൽവാസികളും ഭർത്താവ് ശശിധരനും ചേർന്നാണ് രാധയെ ആശുപത്രിയിൽ പ്രവേശിപ്പിച്ചത്.

മോഷ്ടാവിന്‍റെ കൈയിൽനിന്ന് വെട്ടുകത്തി പിടിച്ചുവാങ്ങി പ്രതിരോധിച്ച് നിന്നതിനാലാണ് ജീവൻ തിരിച്ചുകിട്ടിയതെന്ന് രാധ പറഞ്ഞു. ടീഷർട്ടും മുണ്ടും ധരിച്ച കറുത്ത് ഉയരം കുറഞ്ഞയാളാണ്​ മോഷ്​ടാവ്​. ഇവരുടെ വീടിന് മുൻവശത്തെ ആളൊഴിഞ്ഞ പറമ്പിലെ മോട്ടോർ ഷെഡ്ഡിന് പുറകിൽ മറഞ്ഞിരുന്ന മോഷ്ടാവ് ശശിധരൻ നടക്കാനിറങ്ങിയ സമയം നോക്കി അകത്തേക്ക് കടന്നതാകാമെന്നാണ് പൊലീസ് നിഗമനം.

മോഷ്​ടാവ് കൊണ്ടുവന്ന വെട്ടുകത്തി വീടിനകത്തുനിന്ന് കണ്ടെത്തി. കൊടുങ്ങല്ലൂർ ഡിവൈ.എസ്.പി യു. പ്രേമന്‍റെ നേതൃത്വത്തിലെ പൊലീസ് സ്ഥലത്തെത്തി അന്വേഷണമാരംഭിച്ചു. വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി തെളിവുകൾ ശേഖരിച്ചു.