കൂട്ടായിയില്‍ സി.പി.എം പ്രവർത്തക​െൻറ വീടിന് തീയിട്ടു; മകൾക്ക് പൊള്ളലേറ്റു

പുറത്തൂർ (മലപ്പുറം): ഒരു മാസത്തെ സമാധാനാന്തരീക്ഷത്തിന് ശേഷം മലപ്പുറത്തെ തീരദേശത്ത്​ വീണ്ടും അശാന്തി. രാഷ്​​ട്രീയ സംഘര്‍ഷ മേഖലയായ കൂട്ടായി അരയന്‍ കടപ്പുറത്ത് സി.പി.എം പ്രവർത്തക​​​െൻറ വീടിനകത്തേക്ക് മണ്ണെണ്ണയൊഴിച്ച് തീകൊടുത്തതിനെ തുടര്‍ന്ന് മുറിയില്‍ ഉറങ്ങിക്കിടന്ന മകൾക്ക് ഗുരുതര പൊള്ളലേറ്റു. സി.പി.എം പ്രവര്‍ത്തകന്‍ അരയന്‍ കടപ്പുറം കുറിയ​​​െൻറ പുരക്കല്‍ സൈനുദ്ദീ​​​െൻറ വീടിനാണ് തീയിട്ടത്. ഗുരുതര പരിക്കേറ്റ മകള്‍ നിസല്‍ജയെ (16) പെരിന്തല്‍മണ്ണ ഇ.എം.എസ് ആശുപത്രിയില്‍ പ്രവേശിപ്പിച്ചു. സൈനുദ്ദീ​​​െൻറ മാതാവ് പരിക്കേല്‍ക്കാതെ രക്ഷപ്പെട്ടു. 

ശനിയാഴ്ച പുലർച്ച ഒന്നിനായിരുന്നു സംഭവം. തുറന്നിട്ടിരുന്ന ജനലിലൂടെ മുറിക്കകത്തേക്ക് മണ്ണെണ്ണ ഒഴിക്കുകയും തീകൊളുത്തുകയുമായിരുന്നെന്ന് സൈനുദ്ദീന്‍ പറഞ്ഞു. നിസല്‍ജ കിടക്കാന്‍ വിരിച്ചിരുന്ന പായയില്‍ പടര്‍ന്ന തീ ദേഹത്തേക്ക്​ ആളിപ്പടരുകയായിരുന്നു. 50 ശതമാനത്തിലേറെ പൊള്ളലേറ്റു. വയോധികയായ വല്യുമ്മക്ക് കൂട്ട് കിടന്നതായിരുന്നു നിസല്‍ജ. കട്ടിലിലായിരുന്നതിനാലാണ് വല്ല്യുമ്മ പരിക്കേല്‍ക്കാതെ രക്ഷപ്പെട്ടത്. വീട്ടുകാർ ശബ്​ദം കേട്ട് ഉണർന്ന​േപ്പാൾ വീട്ടുപരിസരത്ത് നിന്ന് മൂന്നുപേര്‍ ഓടി രക്ഷപ്പെട്ടു. 

സി.പി.എം-മുസ്​ലിം ലീഗ് സംഘര്‍ഷം തുടര്‍ക്കഥയായിരുന്ന മേഖലയില്‍ സമാധാനം തിരിച്ചുവന്നതിനിടെയാണ് സംഭവം. സി.പി.എം പ്രവർത്തകനും സമാധാനസമിതി അംഗവുമാണ് സൈനുദ്ദീ​ൻ. കഴിഞ്ഞ മേയിലുണ്ടായ സംഘര്‍ഷത്തില്‍ ഇദ്ദേഹത്തി​​​െൻറ വീടിന് നേരെ ആക്രമണമുണ്ടായിരുന്നു. വീട്ടുസാമഗ്രികള്‍ തകര്‍ക്കുകയും ഭക്ഷണമുള്‍പ്പെടെ നശിപ്പിക്കുകയും ചെയ്തിരുന്നു.

ആക്രമണത്തി​​​െൻറ രാഷ്​ട്രീയബന്ധം പൊലീസ് അന്വേഷിക്കുന്നു. സനില്‍ജ അപകടനില തരണം ചെയ്തു. സൈനുദ്ദീ​​​െൻറ വീട് മന്ത്രി കെ.ടി. ജലീൽ സന്ദർശിച്ചു. ഇരുപാർട്ടി നേതാക്കളും ഉണ്ടാക്കിയ ചർച്ച തീരുമാനങ്ങൾ ലംഘിക്കുന്ന നടപടിയാണിതെന്നും പൊലീസ് ശക്തമായ നടപടി സ്വീകരിക്കണമെന്നും സമാധാനം നിലനിർത്താൻ മുസ്​ലിം ലീഗിന് ബാധ്യതയുണ്ടെന്നും മന്ത്രി പറഞ്ഞു.