കെ.എസ്.ആർ.ടി.സി പൂട്ടാൻ അനുവദിക്കില്ല; നല്ലനിലയിൽ വളർത്തിക്കൊണ്ടു വരാനുള്ള ശ്രമമാണ്​ വേണ്ടത് -ഹൈകോടതി

കൊച്ചി: കെ.എസ്.ആർ.ടി.സി അടച്ചുപൂട്ടാൻ ഒരു കാരണവശാലും അനുവദിക്കില്ലെന്ന്​ ഹൈകോടതി. സർക്കാർതലത്തിൽ മികച്ച നയതീരുമാനങ്ങളെടുത്ത്​ സാധാരണക്കാർക്ക്​ ആശ്രയമായ ഗതാഗത സംവിധാനം നല്ലനിലയിൽ വളർത്തിക്കൊണ്ടു വരാനുള്ള ശ്രമമാണ്​ വേണ്ടതെന്നും ജസ്റ്റിസ്​ ദേവൻ രാമചന്ദ്രൻ പറഞ്ഞു.

ശമ്പളം എല്ലാ മാസവും പത്തിനകം നൽകണമെന്ന ഉത്തരവ് പാലിച്ചില്ലെന്നാരോപിച്ച് ചില ജീവനക്കാർ നൽകിയ കോടതിയലക്ഷ്യ ഹരജിയിലാണ്​ കോടതിയുടെ വാക്കാൽ നിരീക്ഷണം. ഒക്ടോബറിലെ ശമ്പളം വിതരണം ചെയ്തതായി ​ബുധനാഴ്ച ഹരജി പരിഗണിക്കവേ സർക്കാർ അറിയിച്ചു.

എന്നാൽ, എല്ലാ മാസവും പത്തിനകം ശമ്പളം നൽകണമെന്ന ഉത്തരവ്​ പാലിക്കാത്തതിനാൽ കോടതിയലക്ഷ്യ നടപടി തുടരേണ്ടിവരുമെന്ന് കോടതി പറഞ്ഞു. അല്ലെങ്കിൽ ഉത്തരവിൽ ഇളവുതേടി ഹരജി നൽകണമെന്നും വാക്കാൽ പറഞ്ഞു. ഹരജി അടുത്തയാഴ്ച വീണ്ടും പരിഗണിക്കാൻ മാറ്റി.