നിക്ഷേപകർ വന്നു കാലുപിടിക്കട്ടെ, പണം സൗകര്യമുള്ളപ്പോൾ തരുമെന്ന കെ.ടി.ഡി.എഫ്.സി നിലപാട് അംഗീകരിക്കില്ല -​ഹൈകോടതി

കൊച്ചി: സ്ഥിര നിക്ഷേപം തിരികെ നൽകാത്ത കേരള ട്രാൻസ്പോർട്ട് ഡെവലപ്മെന്‍റ് ഫിനാൻസ് കോർപറേഷൻ ലിമിറ്റഡിന്​ (കെ.ടി.ഡി.എഫ്.സി) വീണ്ടും ഹൈകോടതിയുടെ രൂക്ഷ വിമർശനം. നിക്ഷേപകർ തങ്ങളുടെ കടക്കാരാണെന്ന തരത്തിലാണ് കെ.ടി.ഡി.എഫ്.സിയുടെ പെരുമാറ്റം. നിക്ഷേപകർ വന്നു കാലുപിടിക്കട്ടെ, പണം സൗകര്യമുള്ളപ്പോൾ തരും എന്ന നിലപാട് അനുവദിക്കാനാവില്ലെന്നും ജസ്റ്റിസ് ദേവൻ രാമചന്ദ്രൻ വാക്കാൽ പറഞ്ഞു. യഥാർഥ കടക്കാർ തങ്ങളാണെന്ന ബോധ്യം കെ.ടി.ഡി.എഫ്.സിക്ക്​ വേണം. നിക്ഷേപകർക്ക്​ വേണ്ടത്​ ദയയല്ല, സ്ഥാപനത്തെ വിശ്വസിച്ച്​ നിക്ഷേപിച്ച പണമാണ്. 30.72 ലക്ഷം രൂപ സ്ഥിരം നിക്ഷേപം നൽകിയ കൊൽക്കത്ത ആസ്ഥാനമായ ലക്ഷ്മിനാഥ് ട്രേഡ് ലിങ്ക് പ്രൈവറ്റ് ലിമിറ്റഡ് എന്ന സ്ഥാപനമടക്കം നൽകിയ ഹരജിയാണ് കോടതി പരിഗണിച്ചത്​.

സർക്കാറിന്റെ ഗാരന്റിയുള്ളതിനാലാണ് കെ.ടി.ഡി.എഫ്.സിയിൽ ഹരജിക്കാർ പണം നിക്ഷേപിച്ചതെന്ന്​ കോടതി പറഞ്ഞു. ഈ ഉറപ്പാണ്​​ ലംഘിക്കപ്പെടുന്നത്​. നിക്ഷേപിച്ച പണത്തിനായി കെഞ്ചേണ്ട കാര്യമൊന്നും ഹരജിക്കാർക്കില്ല. അവകാശമാണ് അവർ ചോദിക്കുന്നത്​. അത്​ നൽകാനുള്ള ബാധ്യത കെ.ടി.ഡി.എഫ്.സിക്കുണ്ട്​.

ചൊവ്വാഴ്ച ഹരജി പരിഗണിക്കവെ, വിശദീകരണത്തിന് കെ.ടി.ഡി.എഫ്.സി കൂടുതൽ സമയം ചോദിച്ചത്​ കോടതിയുടെ വിമർശനത്തിന്​ ആക്കംകൂട്ടി. പണം തിരിച്ചുനൽകുന്ന കാര്യത്തിൽ 20 ദിവസമായി നടപടിയെടുത്തില്ല. പലിശ സഹിതം മൂന്നു മാസത്തിനകം നൽകാനാവുമോയെന്ന്​ ചോദിച്ച കോടതി, സർക്കാറിന് നിയന്ത്രണമുള്ള സ്ഥാപനമായിട്ടും നിക്ഷേപകർക്ക്​ പണം മടക്കിനൽകാനാവാത്തത് വിചിത്രമാണെന്നും വിമർശിച്ചു.

വിശദീകരണത്തിന് മൂന്നാഴ്ചകൂടി കെ.ടി.ഡി.എഫ്.സി തേടിയെങ്കിലും രണ്ടാഴ്ച അനുവദിച്ച കോടതി, ഹരജികൾ പിന്നീടു പരിഗണിക്കാൻ മാറ്റി.