'നിയമത്തെ വെല്ലുവിളിക്കാനാണ് ശ്രമമെങ്കിൽ പാഠം പഠിപ്പിക്കും'; ദേവസ്വം ഓഫിസർക്ക്​ ഹൈകോടതിയുടെ താക്കീത്​

കൊച്ചി: തൃപ്പൂണിത്തുറ പൂർണത്രയീശ ക്ഷേത്രോത്സവത്തിൽ കോടതിയുടെ മാർഗനിർദേശങ്ങൾ ലംഘിച്ച് ആനയെ എഴുന്നള്ളിച്ച സംഭവത്തിൽ കോടതിയലക്ഷ്യ നടപടി നേരിടുന്ന ദേവസ്വം ഓഫിസർ രഘുരാമന്​ സ്വീകരണം നൽകിയ സംഭവത്തിൽ ഹൈകോടതിയുടെ വിമർശനം.

കോടതി നടപടികളെ തമാശയായി കാണുകയാണോയെന്ന്​ കോടതിയിൽ ഹാജരായ രഘുരാമനോട്​ ജസ്റ്റിസ് എ.കെ. ജയശങ്കരൻ നമ്പ്യാർ, ജസ്റ്റിസ് പി. ഗോപിനാഥ്​ എന്നിവരടങ്ങുന്ന ഡിവിഷൻ ബെഞ്ച്​ ചോദിച്ചു. ജനങ്ങളുടെ ജീവൻ വെച്ചാണ് ഈ കളി. ഭഗവാന്‍റെ പേരിലാണിതെല്ലാം ചെയ്യുന്നത്​. പത്തുപേർ കൂടിനിന്ന് കൈയടിച്ചതിന്‍റെ പേരിൽ ഹീറോ ആകാൻ ശ്രമിക്കരുത്​. പൊന്നാട അണിയിച്ചത് ആരാണെന്ന്​ അറിയിക്കണമെന്നും നിയമത്തെ വെല്ലുവിളിക്കാനാണ് ശ്രമമെങ്കിൽ പാഠം പഠിപ്പിക്കുമെന്നും രഘുരാമന്​ മുന്നറിയിപ്പ്​ നൽകി.

ആനകൾ തമ്മിൽ മൂന്നുമീറ്റർ അകലം പാലിക്കണമെന്ന ഹൈകോടതി ഉത്തരവ് നിലനിൽക്കെയാണ് ക്ഷേത്രോത്സവത്തിൽ അത് പാലിക്കപ്പെടാതെ പോയത്. അതിനാൽ കോടതിയലക്ഷ്യം നിലനിൽക്കുമെന്ന്​ വ്യക്തമാക്കിയ കോടതി, ഇക്കാര്യത്തിൽ സത്യവാങ്മൂലം ഫയൽ ചെയ്യാനും നിർദേശിച്ചു. മൂന്നുമീറ്റർ അകലം പാലിക്കണമെന്ന ഉത്തരവ് സുപ്രീം കോടതിയിൽ ചോദ്യം ചെയ്തിട്ടുണ്ടെന്ന വിശദീകരണമല്ല വേണ്ടത്​.

മലപ്പുറം തിരൂർ പുതിയങ്ങാടി നേർച്ചക്കിടെ ആന ഇടഞ്ഞതും ഒട്ടകത്തെ ഇറച്ചിക്കായി കൊണ്ടുവന്നതുമായ സംഭവങ്ങളിലും വിശദീകരണം തേടി. പുതിയങ്ങാടിയിൽ ജനങ്ങളും ആനകളും തമ്മിൽ എത്ര അകലം പാലിച്ചിരുന്നുവെന്നതടക്കം അറിയിക്കണമെന്നും ആവശ്യപ്പെട്ടിട്ടുണ്ട്​.