25 വർഷം മുമ്പ്​ കൂലിപ്പണിക്കാരന്‍റെ നാക്കിൽ സിഗരറ്റ്​ കുത്തി പൊള്ളിച്ചു; പ്രതികളായ പൊലീസുകാരുടെ തടവുശിക്ഷ ഹൈകോടതി ശരിവെച്ച്​

കൊച്ചി: 25 വർഷം മുമ്പ്​ കൊല്ലം എഴുകോണിൽ നിരപരാധിയെ ക്രൂരമായ ലോക്കപ്പ്​ മർദനത്തിനിരയാക്കിയ കേസിൽ പ്രതികളായ പൊലീസ്​ ഉദ്യോഗസ്ഥർക്ക്​ കീഴ്​കോടതി വിധിച്ച തടവുശിക്ഷ ഹൈകോടതി ശരിവെച്ചു. 1996ൽ എഴുകോൺ സ്വദേശി അയ്യപ്പനെ ​െപാലീസ് ലോക്കപ്പിൽ ക്രൂരമർദനത്തിന്​ ഇരയാക്കിയ ശേഷം കത്തിച്ച സിഗരറ്റ്​ നാക്കിൽ കുത്തി പൊള്ളലേൽപിച്ച കേസിലെ ഒന്നാം പ്രതിയും സംഭവം നടക്കു​േമ്പാൾ എഴുകോൺ എസ്​.ഐയുമായിരുന്ന ഡി. രാജഗോപാൽ, മൂന്നുമുതൽ അഞ്ചുവരെ പ്രതികളും കോൺസ്​റ്റബിൾമാര​ുമായിരുന്ന മണിരാജ്, ബേബി, ഷറഫുദ്ദീൻ എന്നിവർക്ക്​ ​ കൊട്ടാരക്കര ഒന്നാം ക്ലാസ് മജിസ്ട്രേറ്റ് കോടതി വിധിച്ച ഒരുവർഷം വീതം തടവും 3500 രൂപ പിഴയും ശിക്ഷയാണ്​ ജസ്​റ്റിസ്​ മേരി ജോസഫ്​​ ശരിവെച്ചത്​. രണ്ടാം പ്രതിയായിരുന്ന എ.എസ്.ഐ ടി.കെ. പൊടിയൻ വിചാരണ കാലയളവിൽ മരണപ്പെട്ടു.

1996 ഫെബ്രുവരി എട്ടിന് വൈകീട്ട് 5.45 നാണ് കൂലിപ്പണിക്കാരനായ എഴുകോൺ മുകളുവിള വീട്ടിൽ അയ്യപ്പനെ എഴുകോൺ ​െപാലീസ് കസ്​റ്റഡിയിൽ എടുത്ത് ക്രൂരമായി മർദിച്ചത്. പൊലീസ് ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസ്സപ്പെടുത്തി എന്ന കുറ്റം ചുമത്തിയാണ്​ അറസ്​റ്റ്​ ചെയ്​തത്​. പിറ്റേ ദിവസം വൈകീട്ട് 4.20ന് മജിസ്ട്രേറ്റിന് മുന്നിൽ ഹാജരാക്കുമ്പോൾ പരസഹായം കൂടാതെ എഴുന്നേറ്റു നിൽക്കാൻപോലും കഴിയാത്ത അവസ്ഥയിലായിരുന്ന അയ്യപ്പൻ ലോക്കപ്പ്​ മർദനത്തെക്കുറിച്ച്​ മജിസ്ട്രേറ്റിനോട് പരാതിപ്പെട്ടു. ഇക്കാര്യം റിമാൻഡ് അപേക്ഷയിൽ രേഖപ്പെടുത്തിയ മജിസ്ട്രേറ്റ് അടിയന്തര വൈദ്യസഹായം നൽകാൻ നിർദേശിച്ച് അയ്യപ്പനെ ജാമ്യം നൽകി വിട്ടയച്ചു.

കസ്​റ്റഡിയിൽ ക്രൂരമായി പീഡിപ്പിച്ച ​െപാലീസ് ഉദ്യോഗസ്ഥർക്കെതിരെ കൊട്ടാരക്കര ഒന്നാം ക്ലാസ് മജിസ്ട്രേറ്റ് കോടതിയിൽ 1996ൽതന്നെ അയ്യപ്പൻ സ്വകാര്യ അന്യായം ഫയൽ ചെയ്തു​. 13 വർഷം നീണ്ട നിയമ പോരാട്ടത്തിനൊടുവിൽ 2009 ഏപ്രിൽ മൂന്നിനാണ്​ പൊലീസ്​ ഉദ്യോഗസ്ഥരെ ശിക്ഷിച്ച്​ മജിസ്​ട്രേറ്റ്​ കോടതി ഉത്തരവിട്ടത്​. 10,000 രൂപ അയ്യപ്പന് നഷ്​ടപരിഹാരം നൽകാനും ഉത്തരവുണ്ടായി. ഈ വിധിക്കെതിരെ കൊല്ലം സെഷൻസ് കോടതിയിൽ നൽകിയ അപ്പീലുകൾ 2012ൽ കൊല്ലം അതിവേഗ കോടതി തള്ളി. തുടർന്നാണ് പ്രതികൾ ഹൈകോടതിയെ സമീപിച്ചത്.