യുവതിയുടെ വ്യാജ പീഡന പരാതി: മികച്ച ഉദ്യോഗസ്​ഥൻ അന്വേഷിക്കണം -ഹൈകോടതി

കൊച്ചി: കോവിഡ് പരിശോധന ഫലം നെഗറ്റീവാണെന്ന സർട്ടിഫിക്കറ്റ് വാങ്ങാൻ ചെന്നപ്പോൾ ജൂനിയർ ഹെൽത്ത് ഇൻസ്‌പെക്ടർ പീഡിപ്പിച്ചെന്ന കേസിലെ പരാതിക്കാരിക്കെതി​രെ മികച്ച ഉദ്യോഗസ്​ഥനെ നിയമിച്ച്​ അന്വേഷണം നടത്തണമെന്ന്​​ ൈ​ഹകോടതി. പീഡന പരാതി വ്യാജമാണെന്ന ഡി.ജി.പിയുടെ റിപ്പോർട്ട്​ പരിഗണിച്ചാണ്​ ജസ്​റ്റിസ്​ പി.വി. കുഞ്ഞികൃഷ്​ണ​െൻറ ഉത്തരവ്​.

അന്വേഷണം എത്രയും വേഗം വേണമെന്നും കോടതി നിർദേശിച്ചു​. പീഡനം നടന്നിട്ടില്ലെന്നും പരസ്​പര സമ്മതത്തോടെയുള്ള ശാരീരിക ബന്ധമാണ് നടന്നതെന്നുമുള്ള ഇരയുടെ സത്യവാങ്മൂലത്തെ തുടർന്ന് പ്രതിയായ ഹെൽത്ത് ഇൻസ്പെക്ടർക്ക് കോടതി നേരത്തേ ജാമ്യം അനുവദിച്ചിരുന്നു.

സർട്ടിഫിക്കറ്റ്​ വാങ്ങാൻ തിരുവനന്തപുരം വെള്ളറടയിലെ വീട്ടിലെത്തിയപ്പോൾ പീഡിപ്പിച്ചെന്നായിരുന്നു കുളത്തൂപ്പുഴ കമ്മ്യൂണിറ്റി ഹെൽത്ത് സെൻററിലെ ജൂനിയർ ഹെൽത്ത് ഇൻസ്പെക്ടർക്കെതിരെ യുവതി പരാതി നൽകിയത്​. ഉദ്യോഗസ്ഥന്‍ 77 ദിവസം നിയമവിരുദ്ധമായി കസ്‌റ്റഡിയില്‍ കഴിയേണ്ടിവന്നു. ജാമ്യാപേക്ഷ ഹൈകോടതിയുടെ പരിഗണനയിലിരിക്കേയാണ്‌ പരാതി വീട്ടുകാരുടെ സമ്മർദം മൂലമായിരുന്നെന്ന്‌ പരാതിക്കാരി ഹൈകോടതിയില്‍ സത്യവാങ്‌മൂലം നല്‍കിയത്‌. ഉദ്യോഗസ്ഥന്‌ ജാമ്യം അനുവദിച്ച കോടതി വ്യാജ പരാതിയെപ്പറ്റി അന്വേഷിച്ച്‌ റിപ്പോര്‍ട്ട്‌ നല്‍കാൻ സംസ്ഥാന പൊലീസ്​ മേധാവിക്ക്‌ നിര്‍ദേശം നല്‍കുകയായിരുന്നു. തുടർന്നാണ്​ ഇത്​ സംബന്ധിച്ച അന്വേഷണ റിപ്പോർട്ട്​ ഡി.ജി.പി കോടതിയിൽ സമർപ്പിച്ചത്​.