യു.എ.പി.എ കേസുകളിൽ മുൻ‌കൂർ ജാമ്യ ഹരജി നിലനിൽക്കില്ലെന്ന്​ ഹൈകോടതി

കൊച്ചി: യു.എ.പി.എ ചുമത്തിയ കേസുകളിൽ അത്യപൂർവ സാഹചര്യത്തിലല്ലാതെ മുൻ‌കൂർ ജാമ്യ ഹരജി നിലനിൽക്കില്ലെന്ന്​ ഹൈകോടതി. നയതന്ത്ര ചാനൽ സ്വർണക്കടത്ത് കേസിൽ വിദേശത്ത് ഒളിവിൽ കഴിയുന്ന 20ാം പ്രതി പെരിന്തൽമണ്ണ സ്വദേശി അഹമ്മദ് കുട്ടി പൊതിയിലിന്‍റെ മുൻ‌കൂർ ജാമ്യ ഹരജി തള്ളിയാണ്​ ജസ്റ്റിസ്​ പി.ബി. സുരേഷ് കുമാർ, ജസ്റ്റിസ്​ സി.എസ്. സുധ എന്നിവരടങ്ങുന്ന ഡിവിഷൻ ബെഞ്ചിന്‍റെ നിരീക്ഷണം. എൻ.ഐ.എ പ്രത്യേക കോടതി മുൻകൂർ ജാമ്യ ഹരജി തള്ളിയതിനെ തുടർന്നാണ്​ ഇയാൾ ഹൈകോടതിയെ സമീപിച്ചത്​.

തീവ്രവാദക്കുറ്റം ചുമത്തിയതിനെതിരെ ഹൈകോടതിയു​ടെ നിരീക്ഷണമടക്കം ചൂണ്ടിക്കാട്ടിയാണ് പ്രത്യേക കോടതിയിൽ മുൻകൂർ ജാമ്യ ഹരജി നൽകിയത്. മറ്റു പ്രതികളുടെ മൊഴിയല്ലാതെ ഹരജിക്കാരനെതിരെ അന്വേഷണ ഏജൻസി കൂടുതൽ തെളിവുകളൊന്നും കണ്ടെത്തിയിട്ടില്ലെന്നായിരുന്നു ഒരു വാദം. ഇതേ കേസിൽ മറ്റു പ്രതികൾക്ക്​ ജാമ്യം ലഭിച്ചതും ചൂണ്ടിക്കാട്ടി.

എന്നാൽ, യു.എ.പി.എ നിയമപ്രകാരമുള്ള കുറ്റങ്ങൾ ചുമത്തിയതിനാൽ നിയമത്തിലെ 43 ാം വകുപ്പനുസരിച്ച് മുൻകൂർ ജാമ്യ ഹരജി നിലനിൽക്കില്ലെന്ന് എൻ.ഐ.എക്കുവേണ്ടി ഹാജരായ ഡെപ്യൂട്ടി സോളിസിറ്റർ ജനറൽ വാദിച്ചു. അതേസമയം, പട്ടികജാതി -പട്ടികവർഗ പീഡന നിരോധന നിയമത്തിലും സമാന വകുപ്പുണ്ടെന്നും ഇത്​ പ്രകാരം മുൻകൂർ ജാമ്യത്തിന്​ അർഹതയുണ്ടെന്നും ഹരജിക്കാരനും ചൂണ്ടിക്കാട്ടി. കോടതിയുടെ പ്രത്യേക അധികാരം ഉപയോഗിച്ച്​ മുൻകൂർ ജാമ്യം അനുവദിക്കാവുന്നതാണെന്നും ബോധിപ്പിച്ചു.

എന്നാൽ, പട്ടികജാതി -പട്ടികവർഗ പീഡന നിരോധന നിയമത്തിൽനിന്ന്​ വ്യത്യസ്തമാണ്​ എൻ​.ഐ.എ നിയമത്തിലെ സമാന വ്യവസ്ഥയെന്നും രണ്ട്​ നിയമങ്ങളും താരതമ്യം ചെയ്യാനാവില്ലെന്നും എൻ.ഐ.എ വാദിച്ചു. ഇരു നിയമങ്ങളിലെയും വകുപ്പുകളും സുപ്രീംകോടതി വിധികളും പരിശോധിച്ച ഡിവിഷൻ ബെഞ്ച്, യു.എ.പി.എ കേസുകളിൽ മുൻകൂർ ജാമ്യ ഹരജി നിലനിൽക്കില്ലെന്ന്​ വ്യക്​തമാക്കി.

കുറ്റകൃത്യവുമായി ബന്ധമില്ലെന്ന്​ പ്രഥമദൃഷ്ട്യാ ബോധ്യമാകുന്ന അത്യപൂർവ സാഹചര്യത്തിൽ മാത്രമാണ്​ ഇത്തരം കേസുകളിൽ കോടതിക്ക്​ മുൻകൂർ ജാമ്യം നൽകാൻ അധികാരമുള്ളത്​. എന്നാൽ, ഈ കേസിൽ ഇത്തരമൊരു സാഹചര്യമില്ല. രാജ്യത്തിന്‍റെ സാമ്പത്തിക ഭ​​ദ്രതയെ ബാധിക്കുമെന്നറിഞ്ഞുകൊണ്ടുതന്നെ പ്രതി ചെയ്ത കുറ്റകൃത്യമാണ്​. കസ്റ്റഡിയിൽ ചോദ്യം ചെയ്യൽ അനിവാര്യമെന്ന എൻ.ഐ.എ വാദം അംഗീകരിച്ച കോടതി ഹരജി തള്ളുകയായിരുന്നു.