ഗവേഷക വിദ്യാർഥിക്ക് ഫെലോഷിപ് തുക നൽകിയില്ലെങ്കിൽ കാലടി സർവകലാശാല വി.സിക്കും രജിസ്ട്രാർക്കും ശമ്പളം നൽകരുതെന്ന് ഹൈകോടതി

കൊച്ചി: ഗവേഷക വിദ്യാർഥിക്ക്​​ ഫെലോഷിപ് തുക നൽകാത്തപക്ഷം കാലടി സർവകലാശാല വൈസ്​ ചാൻസലർക്കും രജിസ്​ട്രാർക്കും ശമ്പളം നൽകരുതെന്ന്​ ഹൈകോടതി. സാമ്പത്തിക ബുദ്ധിമുട്ടിന്റെ പേരുപറഞ്ഞ്​ അർഹതപ്പെട്ട​ ഫെലോഷിപ് നൽകുന്നില്ലെന്ന്​ കാട്ടി സർവകലാശാലയിലെ ഗവേഷക വിദ്യാർഥി ഇ. ആദർശ് നൽകിയ ഹരജിയിലാണ് ജസ്റ്റിസ് ഡി.കെ. സിങ്ങിന്റെ ഉത്തരവ്.

സാമ്പത്തിക ബുദ്ധിമുട്ട്​ സർവകലാശാല വിശദീകരിച്ചെങ്കിലും രജിസ്​ട്രാർ അടക്കമുള്ളവർക്ക്​ ശമ്പളം ലഭിക്കുന്നില്ലേയെന്ന് കോടതി ആരാഞ്ഞു. കിട്ടുന്നുണ്ടെന്നായിരുന്നു സർവകലാശാലയുടെ മറുപടി. എങ്കിൽ ഫെലോഷിപ് മുടങ്ങാതെ ലഭിക്കാനുള്ള അർഹത ഹരജിക്കാരനുണ്ടെന്ന്​ കോടതി വ്യക്തമാക്കി.

സർക്കാർ 2.62 കോടിയുടെ സഹായം അടുത്തിടെ അനുവദിച്ചതും​ ചൂണ്ടിക്കാട്ടി. തുടർന്നാണ്​ കുടിശ്ശികയായ ഫെലോഷിപ് ഒരുമാസത്തിനകവും തുടർന്നുള്ള തുക മുടക്കം വരുത്താതെയും നൽകാൻ ആവശ്യപ്പെട്ടത്​. ഉത്തരവ്​ നടപ്പാക്കിയില്ലെങ്കിൽ വി.സിക്കും രജിസ്​ട്രാർക്കും ശമ്പളം നൽകരുതെന്നും​ നിർദേശിച്ചു. മലയാള ഗവേഷണ വിദ്യാർഥിയായ ഹരജിക്കാരന്​ ഫെലോഷിപ് ഒരുവർഷമായിട്ടും കിട്ടാതെ വന്നതോടെയാണ് ഹൈകോടതിയെ സമീപിച്ചത്. കേരള സാഹിത്യ അക്കാദമിയുടെ യുവ കവിത പുരസ്കാര ജേതാവാണ് ഹരജിക്കാരൻ.