തുളസിത്തറയെ അപമാനിച്ച ഹോട്ടൽ ഉടമക്കെതിരെ നടപടിയെടുക്കണമെന്ന് ഹൈകോടതി

കൊച്ചി: തുളസിത്തറയെ അപമാനിച്ച ഹോട്ടൽ ഉടമക്കെതിരെ പൊലീസ് നടപടിയെടുക്കണമെന്ന് ഹൈകോടതി. ഹിന്ദു സമൂഹം പവിത്രമായി കരുതുന്ന തുളസിത്തറക്ക്​ നേരെ ചെയ്ത പ്രവൃത്തി മത വികാരം വ്രണപ്പെടുത്തുന്നതാണെന്ന്​ വിലയിരുത്തിയാണ്​ ജസ്റ്റിസ് പി.വി.കുഞ്ഞികൃഷ്ണന്‍റെ ഉത്തരവ്​.

ഗുരുവായൂരിൽ ഹോട്ടൽ ഉടമയായ അബ്​ദുൽ ഹക്കീമിന്‍റെ വിഡിയോ സമൂഹ മാധ്യമങ്ങളിൽ പ്രചരിച്ചിരുന്നു. ഈ ദൃശ്യങ്ങൾ പ്രചരിപ്പിച്ചെന്ന കേസിൽ പ്രതിയായ ആലപ്പുഴ സ്വദേശി ആർ. ശ്രീരാജിന് ജാമ്യം അനുവദിച്ചുകൊണ്ടുള്ള ഉത്തരവിലാണ്​ കോടതി നിർദേശം.

ഹരജിക്കാരൻ നൽകിയ പെൻഡ്രൈവിലെ ദൃശ്യങ്ങൾ കോടതി പരിശോധിച്ചു. കുറ്റം ചെയ്തയാൾ മനോരോഗിയാണെന്നാണ്​ പറയുന്നത്​. എന്നാൽ, വിഡിയോ ദൃശ്യങ്ങളിൽനിന്ന് പ്രഥമദൃഷ്ട്യാ ഇത്​ സത്യമാണെന്ന്​ കരുതാനാവില്ലെന്ന്​ കോടതി അഭിപ്രായപ്പെട്ടു.

മാത്രമല്ല, സ്വന്തം പേരിൽ ലൈസൻസുള്ള ഹോട്ടലും ഇയാൾ നടത്തുന്നുണ്ട്​. ഒരു മനോരോഗിക്ക് എങ്ങനെ ഡ്രൈവിംഗ് ലൈസൻസ് കിട്ടിയെന്നും അന്വേഷിക്കണം. വിഡിയോ പ്രചരിപ്പിച്ചതെന്ന്​ പറയുന്ന ഇൻസ്റ്റഗ്രാം, ഫെയ്‌സ്ബുക്ക് അക്കൗണ്ടുകൾ തന്റെ പേരിലുള്ളതല്ലെന്ന ഹരജിക്കാരന്റെ വാദം അംഗീകരിച്ചാണ്​ കോടതി ജാമ്യം അനുവദിച്ചത്​. 50,000 രൂപയുടെ സ്വന്തവും തത്തുല്യ തുകക്കുമുള്ള രണ്ട് ആൾ ജാമ്യത്തിന്റെയും അടിസ്ഥാനത്തിലാണ്​ ജാമ്യം അനുവദിച്ചത്​.