തെരഞ്ഞെടുപ്പ്​ ഹരജിയിൽ പ്രിയങ്ക ഗാന്ധിക്ക് ഹൈകോടതി​ നോട്ടീസ്

കൊച്ചി: വയനാട് ലോക്സഭ മണ്ഡലത്തിൽ നിന്നുള്ള തെരഞ്ഞെടുപ്പ്​ ചോദ്യം ചെയ്യുന്ന ഹരജിയിൽ പ്രിയങ്ക ഗാന്ധി എം.പിക്ക്​ ഹൈകോടതിയുടെ നോട്ടീസ്​. പ്രിയങ്ക ഗാന്ധിയുടെ തെരഞ്ഞെടുപ്പ് റദ്ദാക്കണമെന്നാവശ്യപ്പെട്ട് ബി.ജെ.പി സ്ഥാനാർഥി നവ്യ ഹരിദാസ് സമർപ്പിച്ച ഹരജിയിലാണ്​ ജസ്റ്റിസ്​ കെ. ബാബു നോട്ടീസ്​ അയക്കാൻ ഉത്തരവായത്​.

സ്ഥാനാർഥിയുടെയും ഭർത്താവ്​ റോബർട്ട്​ വ​ദേരയടക്കം ബന്ധുക്കളുടെയും സ്വത്ത് വിവരം മറച്ചുവെച്ചാണ് ആസ്തി വിവരങ്ങളടങ്ങുന്ന സത്യവാങ്മൂലം സമർപ്പിച്ചതെന്നാരോപിച്ചാണ് ഹരജി​. നിക്ഷേപങ്ങളുടെ വിവരങ്ങൾ പൂർണമായും വെളിപ്പെടുത്തിയിട്ടില്ല.

ഇത്​ തെരഞ്ഞെടുപ്പ് ചട്ടങ്ങളുടെ ലംഘനമാണ്​. ഹരജിയിൽ പ്രാഥമിക വാദത്തിനു ശേഷമാണ്​ നോട്ടീസ്​ ഉത്തരവായത്​. ഹരജി വീണ്ടും ആഗസ്റ്റിൽ പരിഗണിക്കാൻ മാറ്റി.