ഹൈകോടതി ജഡ്ജി ക്വാറന്‍റീനിൽ; അഭിഭാഷക അസോസിയേഷൻ ഓഫീസ് അടച്ചു

കൊച്ചി: റിപ്പോർട്ട് സമർപ്പിക്കാനെത്തിയ പൊലീസുകാരന് കോവിഡ് സ്ഥിരീകരിച്ചതിനെ തുടർന്ന് ഹൈകോടതി ജഡ്ജി ക്വാറന്‍റീനിൽ പ്രവേശിച്ചു. കോവിഡ് ബാധിച്ച പൊലീസുകാരൻ ഓഫീസിൽ എത്തിയിരുന്നതിനാൽ ഹൈകോടതിയിലെ അഭിഭാഷക അസോസിയേഷൻ ഓഫീസ് അടച്ചു.

കോവിഡ് സ്ഥിരീകരിച്ച കളമശ്ശേരി പൊലീസ് സ്റ്റേഷനിലെ ഉദ്യോഗസ്ഥാനാണ് ഹൈകോടതിയിൽ എത്തിയത്. ഹൈകോടതിയിലെ ഒന്നാം നിലയിൽ എത്തിയ ഇദ്ദേഹം റിപ്പോർട്ട് കൈമാറി. ഈ റിപ്പോർട്ട് പിന്നീട് ജഡ്ജിക്ക് നൽകിയിരുന്നു.

ജഡ്ജിയുടെ പേഴ്സണൽ സ്റ്റാഫും ഓഫീസ് ജീവനക്കാരും, ഗവ. പ്രോസിക്യൂട്ടറും ഓഫീസ് ജീവനക്കാരും നിരീക്ഷണത്തിൽ പ്രവേശിച്ചിട്ടുണ്ട്.

കോവിഡ് രോഗിയായ പൊലീസുകാരനുമായി സമ്പർക്കത്തിലേർപ്പെട്ട മറ്റുള്ളവരെ കണ്ടെത്താൻ സി.സി.ടി.വി പരിശോധിക്കും. അണുനശീകരണം നടത്താൻ അഗ്നിശമന സേന ഹൈകോടിയിൽ എത്തി.