കെ.ടി.യു, ഡിജിറ്റൽ താൽക്കാലിക വി.സിമാർ വെള്ളിയാഴ്ചവരെ തുടരാൻ നിർദേശിച്ച്​ ഹൈകോടതി

കൊച്ചി: കേരള സാങ്കേതിക (കെ.ടി.യു), ഡിജിറ്റൽ സർ‌വകലാശാലകളിലെ താൽക്കാലിക ​വൈസ്​ ചാൻസലർമാർ വെള്ളിയാഴ്ച വരെ തുടരാൻ ഹൈകോടതി ഡിവിഷൻ ബെഞ്ച്​ ഉത്തരവ്​. സർവകലാശാലകളുടെ ജനറൽ കൗൺസിൽ, എക്​സിക്യൂട്ടിവ്​ കൗൺസിൽ, ഗവേണിങ്​​ ബോഡി തുടങ്ങിയവയുടെ നിർദേശമുണ്ടായാൽ പോലും നയപരമായ തീരുമാനങ്ങൾ എടുക്കരുതെന്ന നിർദേശത്തോടെയാണ്​ തൽസ്ഥിതി തുടരാൻ ജസ്റ്റിസ്​ അനിൽ കെ. നരേന്ദ്രൻ, ജസ്റ്റിസ്​ പി.വി. ബാലകൃഷ്ണൻ എന്നിവരടങ്ങുന്ന ഡിവിഷൻ ബെഞ്ച്​ ഉത്തരവിട്ടത്​.

രണ്ട്​ താൽക്കാലിക വി.സിമാരെയും ഗവർണർ കൂടിയായ ചാൻസലർ നിയമിച്ചത്​ നിയമപരമല്ലെന്ന സിംഗിൾ ബെഞ്ച്​ ഉത്തരവിനെതിരെ ചാൻസലറും വി.സിമാരും നൽകിയ അപ്പീൽ ഹരജിയിലാണ്​ ഇടക്കാല ഉത്തരവ്​. തുടർന്ന്​ വ്യാഴാഴ്ച ഉച്ചക്കുശേഷം വാദം തുടരാൻ ഹരജികൾ മാറ്റി. സർക്കാർ നൽകിയ പട്ടിക അവഗണിച്ച് ഡോ. കെ. ശിവപ്രസാദ്, ഡോ. സിസ തോമസ്​ എന്നിവരെ അന്നത്തെ ഗവർണറായിരുന്ന ആരിഫ് മുഹമ്മദ് ഖാൻ നിയമിച്ചത്​ സർവകലാശാല നിയമങ്ങളിലെ വകുപ്പുകൾ പ്രകാരം നിലനിൽക്കുന്നതല്ലെന്നായിരുന്നു സിംഗിൾ ബെഞ്ച്​ ഉത്തരവ്​. എന്നാൽ, നിയമന കാലാവധി മേയ്​ 27ന്​ പൂർത്തിയാകുന്നതിനാൽ ​അതുവരെ തുടരാമെന്നും വ്യക്തമാക്കിയിരുന്നു.

പ്രസക്തമായ വസ്തുതകളും നിയമവും പരിഗണിക്കാതെയുള്ള സിംഗിൾ ബെഞ്ചിന്‍റെ ഉത്തരവ്​ തെറ്റാണെന്ന്​ ചാൻസലറുടെയും വി.സിമാരുടെയും അഭിഭാഷകർ വാദിച്ചു. താൽക്കാലിക വി.സി നിയമനത്തിന്​ ശിപാർശ ചെയ്ത്​ സർക്കാറിന്‍റെ പട്ടിക ചാൻസലർക്ക്​ നൽകാമെങ്കിലും യു.ജി.സി ചട്ടം പാലിച്ച്​ നിയമനം നടത്താൻ ചാൻസലർക്ക്​ അധികാരമുണ്ടെന്ന്​ അഭിഭാഷകൻ വാദിച്ചു. വി.സി നിയമനം സംബന്ധിച്ച്​ ബന്ധപ്പെട്ട സർവകലാശാല നിയമങ്ങളിലെ ചില വ്യവസ്ഥകൾ 2018ലെ യു.ജി.സി റെഗുലേഷന് വിരുദ്ധമാണെന്നത്​ കോടതി പരിഗണിച്ചിട്ടില്ല.

യു.ജി.സി ചട്ടങ്ങ​ളാണ്​ പരമപ്രധാനമെന്ന മുൻ​ കോടതി ഉത്തരവുകളും പരിഗണിച്ചിട്ടില്ല. വി.സിമാരുടെ സ്ഥിരനിയമനത്തിന്​ സെലക്ഷൻ കമ്മിറ്റിയിലേക്ക്​ പ്രതിനിധിയെ അയക്കാത്തത്​ സർക്കാറാണെന്നും നിയമ നടപടികളിൽ കുടുങ്ങി സ്ഥിരനിയമനം നീളുകയാണെന്നും ചാൻസലറുടെ അഭിഭാഷകൻ ചൂണ്ടിക്കാട്ടി. എന്നാൽ, സെലക്ഷൻ കമ്മിറ്റി സർക്കാർ രൂപവത്​കരിച്ച്​ സ്ഥിരനിയമനത്തിന്​ നടപടികൾ ആരംഭിച്ചിരുന്നതായി സർക്കാർ വാദിച്ചു. അധികാരമില്ലാതെയാണ്​ ചാൻസലർ സെലക്ഷൻ കമ്മിറ്റിയുണ്ടാക്കിയത്​. ഇത്​ ചോദ്യംചെയ്യുന്ന ഹരജികളിൽ നിയമനടപടികൾ പരിഗണനയിലാണെന്നും സർക്കാർ പറഞ്ഞു.