ശബരിമലയിൽ എവിടെയൊക്കെ അയ്യപ്പ വിഗ്രഹം സ്ഥാപിച്ചിട്ടുണ്ടെന്ന്​​ അറിയിക്കണമെന്ന്​ ഹൈകോടതി

കൊച്ചി: ശബരിമലയിലെ മറ്റ്​ എവിടെയെല്ലാം അയ്യപ്പ വിഗ്രഹം സ്ഥാപിച്ചിട്ടുണ്ടെന്ന്​ സ്പെഷൽ കമീഷണർ അന്വേഷണം നടത്തി റിപ്പോർട്ട്​ നൽകണമെന്ന്​ ഹൈകോടതി. അന്നദാന മണ്ഡപത്തിലടക്കം വിഗ്രഹം സ്ഥാപിച്ചത്​ ചൂണ്ടിക്കാട്ടിയാണ്​ ജസ്റ്റിസ്​ അനിൽ കെ.നരേന്ദ്രൻ, ജസ്റ്റിസ്​ എസ്​. മുരളീകൃഷ്ണ എന്നിവരടങ്ങുന്ന ഡിവിഷൻ ബെഞ്ചിന്‍റെ നിർദേശം. ശബരിമല ക്ഷേ​ത്രാങ്കണത്തിൽ അയ്യപ്പന്റെ പഞ്ചലോഹ വിഗ്രഹം സ്ഥാപിക്കാൻ അനുമതി ലഭിച്ചെന്ന്​ അവകാശപ്പെട്ട്​ ധനസമാഹരണം നടത്താൻ ലഘുലേഖയടക്കം അടിച്ചിറക്കിയ സംഭവത്തിലും വിശദമായ അന്വേഷണം വേണമെന്ന് കോടതി നിർദേശിച്ചു.

ഈറോഡ് ലോട്ടസ് മൾട്ടി സ്പെഷ്യാലിറ്റി ആശുപത്രി ചെയർമാൻ ഡോ. ഇ.കെ. സഹദേവൻ ഇതിനായി പണപ്പിരിവ് തുടങ്ങിയത്​ കഴിഞ്ഞ ദിവസം ശബരിമല സ്പെഷൽ കമീഷണർ ഹൈകോടതിയെ അറിയിച്ചിരുന്നു. തുടർന്നാണ്​ കോടതി നടപടി. അന്നദാന മണ്ഡപത്തിൽ എന്തിനാണ് വിഗ്രഹമെന്ന്​ കോടതി ആരാഞ്ഞു. പലയിടത്തും വിഗ്രഹങ്ങൾ സ്ഥാപിക്കുന്നത് ഗുരുതര വിഷയമാണ്. വിഗ്രഹം സ്ഥാപിക്കാൻ തന്ത്രിയുടെ അനുമതി വാങ്ങിയോ​? വിഗ്രഹങ്ങൾക്ക് സമീപം നേർച്ചപ്പെട്ടികളും മറ്റും ​വെക്കുന്നുണ്ടോ​? എന്നീ കാര്യങ്ങളും അറിയിക്കണം.

ശബരിമല ക്ഷേത്രാങ്കണത്തിൽ അയ്യപ്പ വിഗ്രഹം സ്ഥാപിക്കാനോ ഇതിന്‍റെ പേരിൽ പണം പിരിക്കാനോ ആർക്കും അനുമതി നൽകിയിട്ടില്ലെന്ന്​ വ്യക്തമാക്കുന്ന അറിയിപ്പ് വെർച്വൽക്യു പ്ലാറ്റ്ഫോമിൽ പ്രസിദ്ധീകരിക്കാൻ കോടതി കഴിഞ്ഞ ദിവസം ഉത്തരവിട്ടിരുന്നു. ഹരജി വീണ്ടും അടുത്തയാഴ്ച പരിഗണിക്കാൻ മാറ്റി.