ദേശീയപാതയിലെ ദുരിതയാത്ര: ഒരാഴ്ചക്കകം പരിഹാരം കണ്ടില്ലെങ്കിൽ പാലിയേക്കര ടോൾ നിർത്തുമെന്ന് ഹൈകോടതി

കൊച്ചി: ഇടപ്പള്ളി-മണ്ണുത്തി ദേശീയപാതയിലെ ഗതാഗതം ദുരിതമായ സാഹചര്യത്തിൽ ടോൾ പിരിവ്​ നിർത്തിവെക്കാതിരിക്കാൻ കാരണമു​ണ്ടെങ്കിൽ അറിയിക്കണമെന്ന്​ ദേശീയപാത അതോറിറ്റിയോട്​ ഹൈകോടതി. പണം നൽകുന്ന യാത്രക്കാർക്ക് സുഗമമായ യാത്രക്ക്​ അവകാശമുണ്ടെന്ന് വിലയിരുത്തിയാണ്​ ജസ്റ്റിസ് എ. മുഹമ്മദ് മുഷ്താഖ്, ജസ്റ്റിസ് ജോൺസൺ ജോൺ എന്നിവരടങ്ങുന്ന ഡിവിഷൻ ബെഞ്ചിന്‍റെ ഉത്തരവ്​.

ഗതാഗതക്കുരുക്ക് രൂക്ഷമായ പാതയിൽ ടോൾ നിർത്തണമെന്നാവശ്യപ്പെട്ട് കോൺഗ്രസ് നേതാവ് ഷാജി കോടങ്കണ്ടത്ത് നൽകിയ ഹരജിയിലാണ്​ കോടതിയുടെ ഇടപെടൽ. ഗതാഗതപ്രശ്നത്തിന്​ ഒരാഴ്ചക്കകം പരിഹാരം കാണാനാവുമെന്ന്​​ കേന്ദ്രസർക്കാറിനുവേണ്ടി അഡീ. സോളിസിറ്റർ ജനറൽ അറിയിച്ചു. ടോൾ പിരിവുമായി ബന്ധപ്പെട്ട്​ ഒരാഴ്ചക്കകം സത്യവാങ്​മൂലം നൽകാൻ അതോറിറ്റിയോട്​ ആവശ്യപ്പെട്ട കോടതി, പ്രശ്നത്തിന് പരിഹാരം കണ്ടെല്ലെങ്കിൽ ടോൾ താത്കാലികമായി നിർത്തിവെപ്പിക്കുമെന്ന മുന്നറിയിപ്പും നൽകി. ഹരജി വീണ്ടും 16ന്​ പരിഗണിക്കാൻ മാറ്റി.

സുഗമമായ ഗതാഗതം ഉറപ്പുവരുത്തുന്നതിൽ തികഞ്ഞ ഉദാസീനത​ ദേശീയപാതയുടെ ഭാഗത്തുനിന്നുണ്ടായിട്ടുള്ളതായി വ്യക്തമാണെന്ന്​ കോടതി നിരീക്ഷിച്ചു. ഗതാഗതപ്രശ്‌നം 4.8 കിലോമീറ്ററിലായി കുറഞ്ഞെന്നും ബാക്കി 65 കി.മീ. ദൂരത്ത് തടസ്സങ്ങളില്ലെന്നുമുള്ള വാദത്തിലും കൂടുതൽ വ്യക്തത തേടി. ടോൾ പിരിക്കാനുള്ള അവകാശം നിയമപരമായ വ്യവസ്ഥകളോടെയുള്ളതാണ്​. സുഗമമായ ഗതാഗതം പണം നൽകുന്ന യാത്രക്കാരുടെ അവകാശമാണ്​. എന്നാൽ, നിലവിലെ സാഹചര്യത്തിൽ സുരക്ഷിതവും സുഗമവുമായ യാത്ര ഈ പാതയിൽ സാധ്യമല്ല. ഈ സാഹചര്യം ടോൾ പിരിവ് താൽക്കാലികമായി നിർത്തി​വെക്കുന്നതിലേക്കാണ്​ നയിക്കുക. ദേശീയപാതയുടെ മോശം അവസ്ഥയും ഗതാഗതതടസ്സവും സൂചിപ്പിക്കുന്ന റിപ്പോർട്ടുകളുണ്ടായിട്ടും, ടോൾ പിരിവ് തുടരുന്നതിൽ കോടതി ആശങ്ക പ്രകടിപ്പിച്ചു.

അതേസമയം, പ്രശ്​നപരിഹാരത്തിന്​ ഒരാഴ്ചകൂടി അനുവദിക്കണമെന്നും ഒരാഴ്ചത്തേക്ക് ടോൾ നിർത്തിയാൽപോലും മറ്റ് പ്രത്യാഘാതങ്ങൾക്കിടയാക്കുമെന്നും ദേശീയപാത അതോറിറ്റി വാദിച്ചു. ആശങ്കകൾ പരിഹരിക്കാൻ സംസ്ഥാന സർക്കാറിനെക്കൂടി ഉൾപ്പെടുത്തി യോഗം ചേരുമെന്നും വ്യക്തമാക്കി.